Imigassat aalakoornartullit ammasarneri sivitsorneqariaannaavoq
Naalakkersuisut imigassanik tuniniaanermut, pilerisaarinermullu inatsisissatut siunnersuutissartik tusarniaassutigileruttorpaat.
Imigassat aalakoornartortallit pisiniarfinni ulluinnarni unnukkut arfineq pingasut tungaannut, arfininngornerni ualikkut sisamat tungaanut ukiutoqqamilu tuniniaasinnaannissaq Naalakkersuisunit anguniarneqarpoq.
Aalakoornartortalinnik imigassarsiniarnerni immikkoortortani immikkut inissitani taamaallaat pisisoqarsinnaassasoq inatsisissatut siunnersuummi ilaatinneqarpoq, taamaalilluni aamma immikkut isertafilinni taamaallaat imigassarsisoqarsinnaassasoq siunnersuutigineqarmat.
Aamma atuaruk Imigassaq ammavillugu ammaqquaa
Akerlianilli ussassaarutini imigassat aalakoornartortallit nunatsinni ussassaaruteqannginnissaat inatsisissami ilanngunniarneqarpoq.
Imerniartarfiit unnuami pingasut tungaannut ammasartut ammasarneri aammattaaq sivitsorniarneqarpoq.
Tassani imerniartarfiit nalunnaaqutaq tallimat tungaannut ammasalernissaat siunnersuutigineqarmat.
Tusarniaanneq juunip ulluisa aappaannut killeqarpoq, inatsisartunilu ukiamut akuerineqartussanngorlugu saqqummiunneqassalluni.
