Imigassaq ammavillugu ammaqquaa
Storm Ludvigsen imigassamik ajornartorsiuteqartunik katsorsaasutut ilinniarsimasoq ima tunngavilersuivoq:
- Imerniartarfiit sapaatikkut ammasarunnaartinneqassappata tamanna ajornartorsiummik qimarratiginninnerussaaq.
Taanna aamma isumaqarpoq, arfininngornikkut pisiniarfiit matutinnagit, sulisartut angumersiniaasut imaaginnalivissasut aamma sapaammi imigassaqarniassagunik.
Tusagassiutinut nalunaarummini Storm Ludvigsen allappoq, imigassaq ullaakkut nalunaaqutaq quligiluanut ammaanneqarmat tamanna inuit maanna ilikkarlugu inuussutissanik pisiniarneq salliutittalersimagaat.
- Ullaatungaaniilli imigassamik pisisoqarsinnaalermat kikkut tamarmik tamanna ernumanartoqartippaat. Storm Ludvigsen oqarpoq, ilanngullu oqarluni eqqortumik iliornerussagaluartoq imigassaq sapaammi aamma pisiarineqarsinnaaleraluarpat.
- Maannakkut imigassartortarnerput imigassamillu atuisarnerput ilikkariartorparput aqqulli takisooq atoqqaarumaarparput tamatuma ilikkavinnissaanut. Imigassap torersumik atortariaqarnera aatsaat TV aqqutigalugu paasititsiniutitut saqqumilaarnerulerpat aammalu atuarfinni tamanna ilinniartitsissutigineqartalerpat inuiaqatigiinni imigassamut isiginnittaaserput allanngussaaq, Storm Ludvigsen oqarpoq.
