Steen Lynge: Tunumi aalakoornartulinnik tuniniaaneq unikkallarli
Imigassamik aalakoornartortalimmik tuniniaaneq unitsinneqarallarli. Tunumi inuuniarnermikkut ajornartorsiuterpassuit qaangerniarneqarnissaannut tamanna iluaqutaassaaq. Atassut sinnerlugu Inatsisartunut ilaasortaq Steen Lynge taama siunnersuuteqarpoq.
Steen Lynge
Allattoq Jonas Fievé
aggustip 19-at 2016 11:38
Nutserisoq Mads Lynge
Tasiilami Kuummiunilu meeqqat sumiginnarneqarsimasut pillugit nalunaarusiaq, Meeqqat Illersuisuannit Aviaaja Egede Lyngemit saqqummiunneqareersorlu Steen Lynge taama oqarpoq.
- Kommuneqarfik Sermersuup isumaginninnikkut akisussaaffini naammassisimanngilai. Innuttaasut ikiorserneqarnissaannut naammattumik suliniuteqarsimanngilaq, kommunimmi inunnik isumaginninneq pingaartissimanngilaa, Steen Lynge, tusagassiuutinut nalunaarummi ilaatigut taama allaaserisaqarpoq.
Naammaleqaaq, taassuma ilanngullugu oqaatigaa:
- Meeqqat pisinnaatitaaffii kiffaanngissuseqarnerallu inersimasut imigassanut aalakoornartortalinnik pisisinnaatitaanerannut naleqqiullugu pingaartinneqarnerusariaqarpoq, Atassut sinnerlugu Inatsisartunut ilaasortaq Steen Lynge oqarpoq.
