Immiaaqqat aalakoornartortaqanngitsut nioqqutaalernissaat taperserneqartoq

Immiaaraq mamarigaanni angerlamulli biilerusulluni imigassartornerulluunniit kingorna nuannarinngikkaanni taava tassunga aaqqiissumik takkuttoqangajalersinnaavoq.

Demokraatimmi immiaaqqanik aalakoornartortaqanngitsunik eqqussuisoqarsinnaalersinnaaneranut siunnersuuteqarput.

Tamannalu Naalakkersuisunit taperserneqarpoq.

AAMMA ATUARUK - Inatsimmik sakkukillinissamut aalajangiinnginnermi eqqarsarluaqqaaritsi

Immiaaqqanik aalakoornartortaqanngitsunik eqqussuinissaq tunngaviatigut inerteqqutaanngilaq. Imminulli akilersinnaanngimmat eqqussuisoqarneq ajorpoq.

Maannakkut aaqqiissutaasartoq malillugu immiaaqqat sodavandillu puiaasat mikisut Kalaallit Nunaata kitaani puiaasanut utertitseriaatsimut naleqquttut atorlugit tunisaasarput.

Utertitsisarnermut malittarisassat allanngortinneqartariaqassasut

Immiaaqqallu aalakoornartutaqanngitsut Nunatsinni puiaasanut atorneqartunut maqiterneqartarnissaat akilersinnaasutut arlaannaanit isigineqarsimanngilaq, naammattumimmi tunisaasinnaanngimmata.

Taamaammat immiaaqqat aalakoornartortaqanngitsut Nunatta kitaani puiaasanik utertitseriaaseq atornagu qillertuusaniitsillugit eqqussorneqarsinnaanissaat maanna siunnersuutigineqarpoq.

Tamannalu siunnersuutitsialaasoq Naalakkersuisut isumaqarput.

AAMMA ATUARUK Imigassamik eqqussuineq appariarsimavoq

- Tunisassiaq taanna immiaaqqamit aalakoornartortalimmit peqqinnarnerummat. Pingaartumik ilaqutariit meerartallit immiaaqqanik aalakoornartortaqanngitsunik piumasartut, kiisalu atuisut immiaaqqanik aalakoornartortaqanngitsunik toqqaasinnaatillugit tamanna angallannermi isumannaassutsimut iluaqutaasorujussuusoq nunani allani misilittakkat takutippaat, Naalakkersuisut allapput.

Imigassaq Ikiaroornartorlu pillugit Siunnersuisooqatigiinni siulittaasup Inga Dora Markussenip
Imigassat aalakoornartortaqanngitsut pillugit siunnersuut ilalerpaa.

Ataatsimuualaarnermi allanik periarfissaqartariaqartoq

- Ataatsimuualaarnermi immiaarartortoqartarpoq, ataatsimuualaarnerlu aalakoornartutunngikkaluarluni peqataaffigineqarusuttoqartarpoq. Tamannalu ullumikkut periarfissaanngilaq. Isumaqarpunga inuit ataasiakkaat immiaaqqamik aalakoornartortaqanngitsumik toqqaasinnaasariaqartut ataatsimuualaaqataallunilu, Imigassaq Ikiaroornartorlu pillugit Siunnersuisooqatigiinni siulittaasoq Inga Dora Markussen taama oqarpoq.

Immiaaqqalli aalakoornartortaqanngitsut pitsaaliuinermut tunngatillugu aamma pitsaanngitsunik nassataqarsinnaapput.

Nunani imigassanik aalakoornartortalinnik pilersaaruteqarnissamut inerteqquteqarfiusuni immiaaqqat aalakoornartortaqanngitsut inatsisiliornermik avaqqutaarinissamut atorluarniarneqarsinnaapput, taamaaliornikkullu nioqqutissianik pilerisaaruteqartoqarsinnaalluni.

AAMMA ATUARUK Suliassat pingasut isiginiagassatit aajuku

Aamma immiaaqqat aalakoornartortaqanngitsut imigassamik aalakoornartortalimmut qanillattortitsisinnaasut, Inga Dora Gudmundsdóttir Markussenip oqaatigaa.

- Immiaaqqanik aalakoornartortaqanngitsut siulliullugit imigarineqarsinnaapput kingornalu immiaaqqat kimittunerusut ussernartorsiorfigilerlugit.

Immiaaqqat aalakoornartortaqanngitsut pillugit siunnersuut Inatsisartuni maajip qulingiluaani aappassaaneerneqassaaq.