Immakkut angallannermi maqaasisat ajunngitsut nalunaarutigineqartoq

Angut inersimasoq, nukappiaqqallu marluk, aqqanilinnik ukiulik, 13-inillu ukiulik, Paamiunit aallareerlutik maqaasineqartutut arfininngornermi unnukkut nalunaarutigineqarput.

Kalaallit Nunaanni Politiit pigaartuisa pisortaat Ole Hald KNR-imut taama ilimatitsivoq.

Umiatsiat marluk Paamiunit arfininngornermi aallarsimapput, ussittorujussuarmilli putsilerpoq umiatsiallu ingerlaaqatigiikkunnaarlutik. Umiatsiap aappaanni ilaasut politiit taamaalinerani kalerrippaat.

- Politiit arfininngornermi unnukkut nalunaaqutaq aqqaneq qaangeraa tanneq marlunngulersoq kalerrinneqarput, angut nukappiaqqallu marluk periarfeerunneqartut attavigineqarsinnaasimanngitsullu, Ole Hald oqarpoq.

Umiatsiaq attaveqarfigissallugu ajornakusoortumiissimavoq. Politiit tamanna pillugu Aasiaat Radio aqqutigalugu pan panimik nassitsipput, VHF-ilu atorlugu umiatsiaq attaveqarfiginiarsaralugu. Tamannali iluatsissinnaasimanngilaq.

Paamiut tungaannut ingerlaartut

Maqaasineqartutut nalunaarutuigineqartut umiatsiamut angisuumut angisuumillu ineeralimmut ilaallutik aallarsimammata politiit nalilerpaat arlaanni unnuisinnaasut.

Kalaallit Nunaanni Politiit umiatsiap maqaasineqartup ingerlaarfiata nalaani sapaammi ullaakkut nalunaaqutaq arfineq-pingasunut qiteqquttoq ujaasilerput. Maqaasineqartutut nalunaarutigineqartut ajunnginnertik namminneq akunneq ataaseq qaangiummat nalunaarutigisinnaasimavaat.

Taamaalinerani Paamiunut ingerlaarnertik nalunaarutigaat, motoriali ajormat kigaatsuinnarmik ingerlaarnerarlutik.

- Umiatsiaq Aasiaat radiomut attaveqarsinnaasimanngilaq. Politiilli ullumi ullaap tungaani nalunaaqutaq aqqaneq qaangerlugu tanneq sisamanut nalunaarfigineqarput maqaasineqartutut nalunaarutigineqartut ajunngitsut angerlamut apuussimasut, politiit pigaartuisa pisortaat Ole Hald KNR-imut oqarpoq.