Unnuaanerani politiit nalunaarutaat: Imigassartorsimalluni eqqissiviilliornerit nalinginnaanngitsut, persuttaanerit sakkortuut, angerlarsimaffimmi eqqissiviilliornerit, imigassartorsimalluni biilernerit

Sapaatip akunnerata naanerani nalinginnaanngitsumik politiit ulapingaatsiarput. Imigassartorsimalluni eqqissiviilliortitsinerit assigiinngitsut pisimapput. Maannalu oqartussat silatusaarnissamik inassuteqarput.

Allattoq Dora Evaldsen

novembarip 24-at 2024 13:24

Ualikkut tallimanngornermiik sapaatip tungaanut Kalaallit Nunaanni Politiinut imigassartorsimatilluni eqqissiviilliortoqarsimaneranit saaffiginnittoqangaatsiarsimavoq.

Tassani imigassartortoqarsimaneranit suliat 67-t, taakkunani angerlarsimaffimmi eqqissiviilliornerit 16-t taakkunani marlunnik meerartallit ilaallutik, imigassartorsimallutik aqqusinermi nalaannartut, persuttaanerit, imigassartorsimalluni biilernerit, aqqusinernilu eqqissiviilliortitsinerit imaaginnavissimapput.

Aammali persuttaanermut suliat arfinillit sakkortungaatsiartut sinerissamiit nalunaarutigineqarsimapput, biilinillu tillinniarnerit pingasut aamma nalunaarutigineqarsimallutik, Poul Kreutzmann Politiit pigaartuisa pisortaat taama oqarpoq.

Aamma atuaruk Politiit ullormut nalunaarutaat: Biilinik ajutoortoqarpoq – arnaq ilaasuinnaagaluartoq imigassartorsimatilluni biilinik ingerlatsisimasutut pasineqarpoq

- Akissarsiffiunngitsumi taamak ulapitsigineq naliginnaanngilaq, julefrokostertulli nalerimmassuk amerlasuut nikissimanerannit peqquteqarsinnaavoq. Eqqissiviilliortitsinerit Nanortalimmiit Qaanaap tungaanut pisimapput.

Julefrokostertussanullu politiit pigaartuisa pisortaat kaammattuuteqarpoq.

- Inuit kaammattorusuppakka imigassartorsimatillutik biilinnginnissaannik, amerlasuummi isumaqartarput killigititaasoq qaangersimanagu kisianni amerlasuut qaangersimasarpaat taamaammat pisunnissaq taxanulluunniit ilaalluni angerlarnissaq kaammattuutigivara, Poul Kreutzmann oqarpoq.

Sapaammili ullorulernerani politiit imigassartorsimatillutik eqqissiviilliortut ikiliartuaarnerarpai.

Aasianni innaallagiaarunneq

Imigassartorsimallutik sulianiit aamma politiit allamik suliaqarsimapput.

Aasiannimi ullaaq qulinut innaallagiaarussimavoq.

Ajutoorneq suli sumik peqquteqarnersoq paasineqanngikkaluartoq ualimut sisamanut innaallagiaqaqqilereersimanissaa ilimagineqarpoq.

Siku saappallaartoq

Aammalu Politiit Qaqortumi tasersuarmi ulorianartumi angalaartoqarneranit attavigineqaqattaarput.

- Sulisutsinnik tasersuarmukartitsisariaqalersimavugut inuit tasersuarmiik ingerlatinniarlugit.

- Tasersuarlu suli ingerlavigineqarnissaminut ulorianarmat tasersuakkoortoqannginnissaa inassutigineqarpoq, Poul Kretzmann oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.