Imeruersaatit inatsisitigut inerteqqutiginiaraat
![](/sites/default/files/styles/image_934x467/public/article_images/energidrik630_2.jpg?itok=SrjmQS36)
Inatsisartut sisamanngornermi novembarip 15-iani inatsisissatut siunnersuut aappassaaneerlugu oqaluuserissavaat, eqqartorneqassalluni imeruersaatit qiimmassaatinik akullit 18-it inorlugit ukiulinnut tuniniarnissaannik sassaalliutiginissaannillu inerteqquteqalernissaq. Imeruersaatit 150 mg/l.-it qaangerlugit koffeinimik akullit uani pineqarput.
Peqqissutsimut Naalakkersuisup Agathe Fontain-ip imeruersaatit qiimmassaatinik imallit 18-it inorlugit ukiulinnut inerteqqutinngortinnissaasa sulissutigineranut pissuteqarpoq ilisimatuussutsikkut misissuinerit takutinnikuummassuk imeruersaatit qiimmassaatinik koffeinitallit peqqinnannginnerat.
Imeruersaatit qiimmassaatinik imallit koffeinimik akoqaramik annertuallaamik pigaanni sunniunnerlussinnaapput, soorlu seersitsineq, meriannguneq, niaqunnguneq, uummammik kassutsitsineq, nukiit sajunnerat, kiisalu pissuserisat allanngornerat, soorlu uniffeerunneq, eqqissisimajunnaarneq, kiisalu annilaanganeq ersilernerlu qaangiuteqqittartut.
- Ajornartorsiut alla tassaavoq meeqqat inuusuttullu imeruersaatinik qiimmassaatinik akulinnik imeraangamik ilisimaneqartutut sukkasuumik aammalu annertoorujussuarmik imertarnerat, kaffip eqeernartuatigut 'ikiaroortutut' misiginissaq angorusullugu, taama inatsisissatut siunnersuummut oqaaseqaatimi allaqqavoq.
Peqqissutsimut Naalakkersuisup aarleqqutigivaa imeruersaatit qiimmassaatinik akullit soorlu Red Bull aamma Cult Cola meeqqat aanngajaarniutinik atuisalernissaanut qaninnerulersitsinermik kinguneqarsinnaasoq:
- Tassunga atatillugu annilaanngatigineqarsinnaavoq meeqqat qiimmassaatitalinnik imeruersaatitortartut piffissap ingerlanerani taamaaqataanik sakkortunerusumilli sunniuteqartumik imigassartornikkut misigisaqarusuttalersinnaasut, taamaalillutillu imigassamik atuiliaartarlutik, kingorna atornerluinermik ajornartorsiuteqalissutigisinnaasaminnik, inatsisissatut siunnersuummut oqaaseqaatimi allaqqavoq.
Inatsisissamut siunnersuuteq akuerineqassappat taava nunatsinni imeruersaatinik qiimmassaatinik akulinnik ussassaarineq, allagartaliineq allatigulluunniit pilerisaarineq inerteqqutaalissaaq. Aviisit nunanit allaneersut, atuagassiat, quppersakkat, tusagassiiffiillu assiliartallit inerteqqummut ilaatinneqanngillat.
Inatsisissatut siunnersuut akuerineqassappat imeruersaatit qiimmassaatinik akullit tamarmik kaffip eqeernartuanik qanoq akoqartiginerinik mianersoqqussutitalerlugit ersarissumik allagartalerneqarsimassapput. Allagartalersorneqarneri qallunaatut kalaallisullu allaqqassapput.
Inatsisissamut siunnersuutip pingajussaanik oqaluuserineqassaaq novembarip 21-iani 2012.