Imarsiornermut ilinniarfik inerisarli nungusarnagu
Palle Christiansen nassuiaavoq ilinniarfinnut qinnuteqartartut ikippallaartut nuussinerlu aaqqiissutaasinnaasoq. Taamali oqarneq pissusiviusunut naapertuutinngitsoq ilinniartitsisut isumaqarput.
Eqqortormi tassaavorooq 2012-mi aggustimi ilinniartut nutaat aallartinnissaannut imarsiornermi ilinniartunngorniarlutik qinnuteqartut 95-usut. Qinnuteqartunit 95-nit 75-it imarsiornermik ilinniartunngornissaq kissaatitut siullertut allassimavaat. Naalakkersuisulli sipaarniaqqusinerat pissutigalugu imarsiornermik ilinniarfik aalajangersimavoq 2012-13-mi ilinniartut nutaat taamaallaat 30-it tiguneqassasut, Paamiuni imarsiornermik ilinniarfimmi ilinniartitsisut siunnersuisoqatigiivini siulittaasoq John Johansen oqarpoq.
Paamiuni ilinniartut najugaat oqaatigineqaraluartutut ajuissorineqanngillat ilinniartut taamaatittarnerannut taakku pissutaatinneqarmata.
-Ilinniartunut inissiat tamakkiisumik pitsanngorsarneqartuuppata ilinniartitsisoqatigiit qularutiginngilaat ilinniartut ilinniarnerminnik unitsitsiinnartartut ikinnerulissagaluartut, kusanartunik ilinniartunullu pilerinartunik najugaqarfeqarneq pissutigerpiarlugu, John Johansen isumaqarpoq.
Imarsiornermik ilinniarfiup Uummannamilu piniarnermut aalisarnermullu ilinniarfiup illoqarfinnut anginernut nuutsinneqarnissaannik oqalunneq unittariaqartoq ilinniartitsisut isumaqarput akerlianillu ilinniarfinni pioreersuni pissutsit iluarsaanneqartariaqartut unnerlugit.
- Atuakkat ilinniartitsissutit maanna atorneqartut ingerlaavartumik nutarterneqartarput, aammalu atuakkat ilinniutit tamarmik kalaallisuumut nutserneqartarlutik. Ilinniartitsinerulli ingerlannera misissuataarutsigu, angallat angisooq pisariaqartinneqarpoq, imaanngitsoq pujortuleeqqat glasfiberiusut marluk 25 aamma 27 fod-inik angissusillit ilinniarfiup sulilluni ilinniartitsissutinut atortagai. Teknik-ikkut atortut aamma piorsartariaqarput ilinniagassani arlalinni sungiusaatitut atugassat, ilinniartut iluaqutigisinnaasaat, Paamiuni imarsiornermik ilinniarfiup ilinniartitsisuini siunnersuisoqatigiit siulittaasuat oqarpoq.