Imarsiornermik Ilinniarfiup nuunnissaa GA-mit ilalerneqarpoq
Ilinniarfiup nuunneqannginnerani suleqatigiissitaliortoqarsimavoq, inuussutissarsiutinik ingerlatallit, GA-llu peqataaffigisaanik, nuussinissaq ilalerneqarsimalluni. Ilinniarfiit Nuummut katersorneqarnissaannut tunngavigineqartut annerit ilagaat ilinnianerminnik unitsitsiinnartartut amerlavallaarneri.
-Nunatsinni ilinniagaqarnissamut periarfissarissaarnerulernissaq ilinniakkamillu kipititsiinnartarunnaarnissaq qanoq pingaartitsigalutigit oqartaannarpugut”, Karsten Klausen Sulisitsisut allattoqarfianni pisortaq oqarpoq. ”Ilinniakkat imminnut assigiissutillit kattullugit imarsiornermi qitiusumik ilinniarfinngorlugu Nuummut nuunneqarnissaanut isumaqataanitsinnut tamakku peqqutaasunut ilaapput. Taamaaliornikkut ilinniartitaanermi nukissat pigisavut pitsaanerusumik atorsinnaalissavavut, ilinniartitaanerit akimorlugit ataatsimut ilinniartitsisoqarnikkut, pitsaanerusumik ilinniartunik ilitsersuinikkut allaffissornikkullu pisinnaasanik atorluaanikkut, GA-p allattoqarfiani pisortaq Karsten Klausen oqarpoq.
Nuummi qitiusumik ilinniarfeqalerpat piukkunnartunik ilinniartoqartalersinnaanissaq ajornannginnerulissaaq, ilinniarluarsimasunik ilinniartitsisoqarniartarneq ajornannginnerulissaaq, taamaalillunilu ilinniartitsineq pitsanngoriaateqassalluni. Ilaatigut suliassaqarfiit ataasiakkaat iluini ataqatigiissitsinikkut ilinniartut pitsaanerusumik sullinneqarnissaat qulakkeerneqassaaq. Pissutsit taama inerneqarlutik ingerlasimanerat umiarsuaatilinnit Nuummiittunit amerlanernit aammalu Kangilinnguani Sakkutooqarfimmit, maanna illoqarfiit pingaarnersaannut nuussimalersumit, tapersersorneqarpoq.
-Imarsiornermik Ilinniarfiup Paamiunit aammalu Aalisarnermut Piniarnermullu Ilinniarfiup Uummannamit nuunneqarsimanera, taamaalillunilu aamma suliffiit pingaarutillit matuneqarsimaneri soorunami Sulisitsisut ajuusaarnartippaat. Taakkununngali taarsiullugu Naalakkersuisut aalajangerput pikkorissartitsisarfik Uummannami pilersinneqassasoq kiisalu ineriartornermikkut ajornartorsiuteqartunut sullissivimmik Paamiuni pilersitsisoqassasoq”, Karsten Klausen erseqqissaavoq.
