Ilinniarneq

IMAK-ip isornartorsiuinera Qaasuitsup pimooruppaa

Inatsisinik unioqqutitsisoqanngilaq, IMAK-imiillu isornartorsiuineq pimoorunneqarpoq, taama Qaasuitsup Kommunianiit qisuariaateqarput, ilinniartitsisut kattuffiata taakku kommunit nakkutilliisoqarfiannut saaffiginnissutigereeraalu.

Allattoq Sandra Meinecke, Nauja Møller

juunip 11-at 2015 15:20

IMAK-miit isornartorsiuineq tusaatissatut tiguarput - taama oqarpoq Qaasuitsup kommuniani pisortaaneq, Hans Eriksen, IMAKip Qaasuitsup Kommunia kommunit nakkutilliisoqarfiannut saaffiginnissutigereeraalu.

- Qaasuitsup Kommuniata aningaasarliornera meeqqanut akilersinneqassanngilaq! Ilinniartitsisut peqatigiiffianni siulittaasoq Sivso Dorph uparuaanera taama aallartippoq.

Aamma atuaruk IMAK-ip Qaasuitsup Kommunia inatsisinik unioqqutitsinerarlugu pisuutikkaa

Tamannalu qaasuitsup kommuniata tusaatissatut tiguaa.

Pisortaaneq Hans Eriksen nassuiaavoq:

- Nunaqarfinni atuartoqassuseq aallaavigalugu annertunerusumik eqqarsaatiginagu tiiminik atuutsitsilernikuummata, taakkuuppulli massakkut immikkoortoqarfitsinnut misissuititsineq ingerlatarput, aammalu KANUKOKA aallaavigalugu arlaatigut naapiffigineqarsinnaasumik massakkut suliaqarluta pivugut, Hans Eriksen taama oqarpoq.

Pilersaarut unioqqutitsinerunngilaq

Kommunimi nunaqarfinni illoqarfinnilu mikinerusuni akunnerit atuartitsiviusussat 15 procentimik appartinneqarnissaat pilersaarutigimmassuk, IMAK-ip tamanna akuererusunngilaa isumaqarlutik pilersaarut atuarfiup inatsisaanik unioqqutitsinerusoq.

Pilersaarusiornerlu unioqqutitsinerunngitsoq, atuarfeqarfinnilu pisortaasut naliliisinnaassusaat tunngavigalugu aaqqissuussisoqaqqissasoq Qaasuitsup Kommunianit Hans Eriksenip naqissuserpaa:

- Meeqqat atuarfiat inatsisaat 2012-meersoq §7 stk.3 aallaavigalugu, taanna periarfissiivoq, pædagogikkimik nalilersuinermik aallaaveqartumik tiimit ikinnerusinnaaneri. Taannalu aallaavigalugu Qaasuitsup Kommuniani atuartitaanermut, kultureqarnermut sunngiffimmullu immikkoortortaqarfimmi ataatsimiitsitaliaq aalajangiisimavoq taamannak ukiumi atuarfiusussami nutaamik taamannak isikkoqartitsissalluni, Hans Eriksen oqarpoq.

Kommunit nakkutilliisoqarfiata saaffiginnissut tigusimallugu uppernarsarpaa, suliamullu tunngasunut oqaaseqarumanngillat.

IMAK-ip uparuaanera pillugu Ilinniartitaanermut Naalakkersuisoqarfimmit atorfilinnit oqaaseqartitsiniaraluarpugut iluatsinnagulu.