Nunat Avannarliit Siunnersuisoqatigiiffiat: Imaani pisuussutit qanoq annaatissavagut?
Siunnersuisoqatigiiffik Norgemit ukioq manna siulittaasuuffigineqarpoq. Norgellu imaani pisussuutit pingaarnertut sammineqarnissaat aamma aalajangigaraa.
Nunat Avannarliit Siunnersuisoqatigiiffiani nunat ilaasortaasut tamarmik sinerissami naalagaaffiunerat imaatalu nunanut avannarlermiunut qanoq pingaaruteqartiginera peqqutigitinneqartoq, Nunat Avannarliit Siunnersuisoqatigiiffiani siulittaasup Michael Tetzschnerip oqaatigaa.
Imaatigut angallattoqalernerunera, assersuutigalugu umiarsuit Kangianut aqqutaasa nutaat atulernerat nunanut ilaasortanut periarfissiilluarnerat akisussaaffeqalernerallu, ilaatigut tikkuartorpaa.
- Imartatta pisuussutaanik atuinerup naleqqussarnissaa qulakkeertariaqarparput. Aalisapiluttarneq pinngitsoortinniarlugu atortussianillu isumannaallisaaneq aamma naleqqussarneqassaaq, Michael Tetzschner oqarpoq.
Kalaallit Nunaata Siunnersuisoqatigiiffimmi sinniisussai marluk Inatsisartunit toqqarneqartarput.
Inatsisartunulli qinersisoqarnissaa peqqutaalluni Nunat Avannarliit Siunnersuisoqatigiiffiata Islandimi Akureyrimi ataatsimiinnissaani kalaallinik peqataasoqassanngitsoq, Inatsisartut allattoqarfiata KNR-imut nalunaarutigaa.
Qineqqusaartoqarnera peqqutaalluni Nunat Avannarliit Siunnersuisoqatigiiffianni Inatsisartut suliaat unitsikkallarneqarput.
