Borgmesteri: Ilulissat Fredericiallu ikinngutigiiginnarnissaat anguniarparput
Tusakumisaarsimavaa, naatsorsuutigisimanaguli taamatut aalajangertoqassasoq.
- Sipaarniarnermut ilaatinniarneqartut ilisimatinneqarpunga, naatsorsuutigisimanngikkaluarparali taamatut aalajangertoqassasoq.
Avannaata Kommuniata borgmesteria Palle Jerimiassen (attaviitsoq) Fredericia Kommunep Kalaallit Nunaat pillugu ataatsimiititaliaqarunnaalersaarnerata kingunerisaanik illoqarfiit ukiuni 54-ini ikingutigiit, Fredericia aamma Ilulissat, suleqatigiikkunnaarnerannik kinguneqartussaassanera pillugu taama oqarpoq.
Tassa Fredericia Kommune Kalaallit Nunaat pillugu ataatsimiititaliaqarunnaarsitsiguni ukiumut 245.000 koruuninik sipaaruteqarfigisassavaa.
Fredericiamut atuariarnissaq kalalallit meerartaannut aamma neqeroorutaajunnaartussaassaaq. Tassa qallunaat kalaallillu meerartaat kulturikkut avitseqatigiissaartussaassapput.
Ikinngutigiiginnarnissaalli Avannaata Kommuniata anguniarpaa:
- Ukiummi 50-it sinnerlugit ikinngutigiinneranni inuppassuit atassuteqaqatigiilernermikkut pissarsiaqartorujussuusarput. Ikinngutigiinnitta arlaatigut ingerlaqqinnissaa anguniassavara, borgmesteri Palle Jerimiassen oqarpoq.
Allatut aaqqiiniaqatiginiarniarai
Taamaammat Palle Jerimiassen Fredericiamut ataatsimiigiassaaq.
- Kalaallit Nunaat pillugu ataatsimiititaliaq taavalu borgmesteri isumaqatiginikuuakka qaammatip uuma naanerani Danmarkimiinninni naapissallugit ikinngutigiinnerup immaqa allatut isikkulerlugu ingerlanneqarsinnaanera oqaloqatigiissutigissagatsigu, Palle Jerimiassen oqarpoq.
Allatulli qanoq aaqqiiniaqatiginiarnerai, taassuma massakkorpiaq oqaatigisinnaanngilaa.
Ataatsimiigiarnissaminulli piareersalereerluni, borgmesteri oqarpoq:
- Maani Ilulissani atuarfiup pisortai tallimanngormat ataatsimeeqatigigakkit suliakkernikuuakka ikinngutigiinnerup ingerlanneqarsinnaanissaanut siunnersuummik suliaqaqqullugit. Taannalu Fredericiamut nassassavara ataatsimeeqatiginissaannut, Palle Jerimiassen oqarpoq.
Illoqarfiit ikinngutigiit marluk taakku suleqatigiinnerat ukiumut 522.000 koruuninik aningaasartuuteqarfigisaritsik, Avannaata Kommuniata allaffeqarfia ilisimatitsivoq.
Fredericiamut tamatumaluunniit eqqaanut atuariartornissaq Ilulissani atuartunut neqeroorutaaginnassappat Fredericia Kommune tamatumunnga aningaasaliiginnartaqquniaritsik, ilanngullugu ilisimatitsissutigaat.
