Ilulissani qineqqusaarnermi TV-ikkut aallakaatitamik naammagittaalliut pillugu

Pele Brobergip KNR-ip qineqqusaarnermut atatillugu aallakaatitaa sakkortuumik uparuarpaa. Sinerissami qineqqusaarnermi partiit namminneq isummersuutiminnik oqaaseqarnissaminnut sivikippallaartumik piffissalerneqarsimasut qinersisartullu apeqqutigisartagai naammaginanngitsut, Broberg isumaqarpoq.

KNR-imi isumaqapugut naammagittaalliortoq qinersisartunik ataatsimiisitsinermi ileqquusartut paatsoorsimagai.

KNR-imi qinersisartunik ataatsimiisitsinerit tassaapput qinersisartut ataatsimiinnerat. Ileqquusoq tassaavoq qinersisartunik qaaqqusineq, taamaasillutillu namminneq apeqqutissaminnik pingaaruteqarsorisaminnik apeqquteqarfigisinnaasaat.

Taamaammallu ataatsimiisitsineq partiit pillugit aaqqissugaanngilaq, KNR-i mikrofonimik politikerinut tunniussisuuginnarluni. KNR politikerit qinersisartut apeqqutaannik akisarnissaat qulakkeerinnittussaavoq.

Pele Broberg-ip aammattaaq qinersisartut apeqqutai nalunanngereernerarpai, tamaatut naliliinera isumaqarpunga qinersisartunik nikassuinerusoq. KNR-imi qinersisartut nammineq isumaminnik pingaaruteqartunik apeqquteqartarnerat ataqqivarput. Qinersinermut demokratimullu pingaaruteqarluinnarpoq qinersisartut akuunissaat, apeqqutigerusutaminnillu aperisarnissaat.

Maanna Partii Naleraq ataatsimiisitsiniarpoq, tassanilu imminnut apeqquteqartarniarput namminnerlu akissuteqarfisarlugit. Qinersisartunit tusagassiortunillu akornutaaginnartussanit apeqquteqarfigineqaratik. Soorunami tamanna KNR-ip, inuiaqatigiinnut kiffartuussisartutut, ileqqussatut imaluunniit malittarisassatut pisussaaffiginngilaa. Nammineq tamanna isumagisariaqarpaat.

Qinersisartunik ataatsimiisitsinerit KNR-ip qinersinissamut tunngasunik pilersaarutaasa arlalillit ilagiinnarpaat. Kingusinnerusukkut partiit qaaqqunikuuagut qineqqusaarnermi apeqqutinut pingaaruteqartunut peqataanissaannut. Apeqqutit pingaarutillit ilaatigut ukuusut: Aalisarneq, meeqqat atuarfiat, naamminiivilernissarlu. Qinersisartunik ataatsimiisitsinerit atatsimut akunnernik 18-inik sivisussuseqartussaapput, immikkullu sammisaqarluni ataatsimiisitsinerit akunnernik 8-nik sivisussuseqarlutik. Taakku saniatigut partiit marluk siuttui naapitinneqassapput, ”akileriilluni oqarlinneq”, kiisalu partiit siuttui ataatsimoortinnerat. Taamaalilluni qinersisartut politikerillu tamarmik periarfissaqarnissaat qulakkeersimaneqassaaq.

KNR-ip tikkuarumavaa partiit aallartitaannik ataatsimiisitsinikuugatta, partiillu ataatsimeeqartaasut tamarmik programmi qimerloorpaat, imarisaa periusissallu oqallisigalugit. Partii Naleraq akunnermik ataatsimik inortuilluni takkuppoq, oqallinnermilu peqataanani. Taassumalu kingorna martsimi, partiit tusagassiortullu tamarmik KNR-ip Inatsisartunut 2018-imi qineqqusaarnissamut qanoq ingerlatsinissaminnut paasissutissanik imalimmik nassinneqarput. Tassalu ataatsimiisitsinissat oqallitsitsineriillu qanoq ittuussanersut, qaqagukkut sumilu pisarnissaannut imallit.

Inussiarnersumik inuulluaqqusillunga

 

Karl-Henrik Simonsen

Direktøri

Isummersuutit