Tusagassiorfinnut nalunaarut KNR tapersersorneqartariaqarpoq ukkatarineqartariaqarlunilu

Nutaarsiassaqartitsivippummi inuiaqatigiinnut pingaarutilerujussuarmik inissisimavoq. KNR-ip pisortartaava Siulersuisullu ivertinneqarsimalersut tusagassiorfinnit alloriaateqanngitsutut, qanorlu iliuuseqanngitsutut uparuartorneqartut, Siulersuisut tulliuttuni ersarissaateqarusupput:

• KNR-ip pisortartaava, KNR-imilu pisortaqatigiit ullormit siullermit, tassa 1. september 2023-miit suliffeqarfimmi avatangiisit sulisussaaleqinermilu ajornartorsiutaasinnaasut pillugit misissueqqissaarnerit aallartippaat,
• KNR-imi siulersuisut pisortaanermut aqutsisunullu tatiginnipput, upperalugulu pisortat ilungersorlutik inerititaqarfiusumik pissutsit ilorraap tungaannut saatsinniarlugit suliaqartut

Siulersuisut anguniarpaat inuiaqatigiinnut kiffartuussivik pitsaasunik atugassaqartitsillunilu sinaakkusersorneqassasoq. Suliniutit tassunga tunngasut aallartereerput, taamatullu KNR-imi aqutsisut tapersersorpagut, KNR inuiaqatigiinni pingaaruteqartutut nutarteriffiulluni, suli nukittunerulluni inuiaqatigiinni suliassani, ullumikkut siunissamilu naammassisinnaassammagit.

Qularutissaanngilaq anguniakkat anguniarneri ilungersunarsinnaajumaarpoq, taamatullu inuiaqatigiinni susassaqartunit tapersersorneqarnissaq pisariaqassaaq, taamatuttaaq politikkikkut akisussaasunit.

Kalaallinik ilinniarluarsimasunik amigaateqarneq nutaajunngilaq, taamatullu atorfinittussatut piukkunnaateqartut allanut ujartuisarput, atorfinni allani atugarissaarfiunerusuni ilaquttatik pilersorsinnaajumallugit, inuiaqatigiinni inuuniarnikkut inissaqarniarnikkullu oqimaatsumik inissisimasoqartarmat. Unammillernartut taakkartorneqartut suliassaqarfinni allani aamma takussaapput, taamaattumik Siulersuisut sammisanut pingaarutilinnut aaqqiiniaqataajumallutik suleqataanissaminnut qilanaarput, tamatumani susassaqartut peqatigalugit suliniarumaarlutik.

Suleqatigiilluarnissamik kissaateqarluta,

Mette Steenholdt
KNR-ip siulersuisuini siulittaasoq