Ilulissani politiit: Ilulissani ikuallaavimmi eqqumiitsumik nassaartoqarpoq

- Pinerlunnermut attuumassuteqarnersoq maannakkut oqaatigisinnaanngikkallarparput, politiit oqarput, erseqqissaatigaallu suli misissuigamik sukumiisumillu paasisaqannginnamik.

Ilulissani eqqaavinnut ikuallaavimmi arlaannik pasinartoqarneranik politiit nassaarnertik sukumiisumillu misissuinissartik pillugu ikuallaavik assersorlugu matusariaqarsimavaat.

Taama pisoqarpoq, politiit ippassaq arfininngornermi nalunaaqutaq 20.30 arlaannik eqqumiitsumik nassaartoqarneranik nalunaarfigitereernerisa kingorna.

- Pinerlunnermut attuumassuteqarnersoq maannakkut oqaatigisinnaanngilarput, politiit allapput, taakku aamma erseqqissaatigaat sulinerminni eqqissillutik misissuinissartik pingaaruteqarmat Ilulissani ikuallaaviup eqqaa assersortariaqarsimagamikku.

Maanngaanniillu politiit attavigisimagaluarpagut oqaaseqarsinnaannginnerarpulli, KNR-imulli nalunaarutigaat ullumi kingusinnerusukkut nutaamik tusagassiutinut nalunaarummik nassiussiumaarlutik.

- Ilulissani innuttaasut ullup ingerlanerani malugisinnaassavaat ikuallaaviup eqqaani politeerpaalunnik sulisoqarnera. Taamaattumillu Ilulissani politiit erseqqissaatigaat eqqaavissuup ikuallaaviusup matoqqatinneqarnera namminnerlu sulinertik ataqqineqaqqullugu, taama politiit tusagassiutinut nalunaarumminni allapput.

- Inummik maqaasisaqartoqarsimasinnaaneranik nalunaaruteqartoqaraniluunniit saaffiginnittoqarnikuunngilaq, taamaammat innuttaasut kajumissaarusuppagut, ikinngutit, ilaquttat ilisarisimasalluunniit allat sapaatip-akunnerata missaani tutsiussimanngippata politiinut piaartumik nalunaarutigeqqullugit, sunalu pillugu inuk pineqartoq maqaasineqarnersoq aamma ilanngullugu paasissutisseeqqullugit, paasissutissaasinnaasummi tamarmik politiinut iluaqutaassaqaat, Ilulissani politiit taama nalunaarput. Nangippullu:

- Illoqarfimmi misissuilluta aallartippugut. Nuummeersunik paasiniaasartunik Ilulissiartitsivugut aammalu Danmarkimiit politiit aammalu nakorsat toqusunik misissuisartut inuup timaata ilaanik nassaarineqartunik misissuisussanngorlugit ikiortiseraagut, maannakkulli oqaatigisinnaanngilarput nassaarineqartoq angutaanersoq arnaanersorluunniit, taamaammallu innuttaasut paasissutisseeqataasinnaappata paasiniaanitsinnut assorsuaq ikiuutaassagaluarpoq, politiit taama oqarput.