Ilulissani mittarfittaassami ikuallattoqarnerani imermik amigaateqartoqartoq

Ilulissani mittarfittaassaq sapaatip akunnera kingullermi tallimanngornermi unnukkut ikuallareersoq upalungaarsimanikkut piareersimanerunissamik takussutissiivoq. Mittarfittaassarmi imilersorneqarnissaa pitsaanerusariaqartoq, Avannaata Kommuniani borgmesteri Lars Erik Gabrielsen (S) oqarpoq. 

- Qamisaaniarnermi illoqarfimmiit imertaatit atorneqartariaqarsimapput, pissutsilli tamakku siusinnerusukkulli naammaginanngitsutut ulorianaateqangaatsiartutullu oqaatiginiarneqartarsimapput, borgmesteri oqarpoq. 

Ikuallattoqarnerata nalaani upalungaarsimasut avataaniit imermik pilersorneqartigatik containerini illulianik qamisaasinnaasimanngillat. Imeq pigineqartoq nungummat qatserisartut erngup illoqarfimmiit imertaatit atorlugit assartorneqarnerani utaqqisariaqartarsimapput qamisaaneq nangeqqinniarlugu. Tamannalu qamisaanerup unitsinneqaqattaarneranik aamma ulorianartup pisariaqanngitsumik annertunerulerneranik nassataqartoq, borgmesteri nassuiaavoq.

- Upalungaarsimasut ikuallattoqartillugu imissaarunnerat imermillu pilersorneqaqqinnissaminnut utaqqisariaqalernerat erngup pigineqareersup naammannginneranik ersersitsivoq. Akuerineqarsinnaanngilaq – ingammik ajornartorsiut oqartussanit akisussaasuniit oqariartuutigineqareernikuusoq eqqarsaatigissagaanni, Lars Erik Gabrielsen (S) oqarpoq.  

Kommunalbestyrelse mittarfittaassamut imermik pilersuinissamut aningaasaleereersoq

Mittarfittaassamut imermik pilersuinissamut aningaasat 500.000 koruunit illikartinneqareerput. Tamanna Avannaata Kommuniani kommunalbestyrelsemi novembarip ulluisa 21-anni 2025-mi ataatsimiinnermi eqqartorneqarpoq. Taassuma saniatigut mittarfeqarfiup biilit qatserutaannut aningaasat 1,5 mio. koruunit atorneqartussatut illikartinneqarput.

Suliniutit taakku siorna pilersinneqaraluartut ikuallannerup kingorna paasinarsivoq, suliniutigineqartut piffissaq sivisunerusoq eqqarsaatigalugu naammanngitsut. 

- Tassa isumaqatiginngisarput tassaavoq imeq mittarfimmut piunngimmat. Imeqarsimasuuppat ataavartumik imermik pilersuineq ikuallattoqarnerani periarfissaasimasinnaagaluartoq, taanna periarfissaq piginngilarput. Tassa taanna isumaqatiginngisarput, takusinnaagatsigut imertaatinik assartoqattaarnermi ajornartorsiut ersarissigami, Avannaata Kommuniani borgmesteri, Lars Erik Gabrielsen (S) oqarpoq.

Ilulissanimi mittarfittaassap toqqaannaq imilersorneqarnissaanut inatsisit ullumikkut atuuttut malillugit aqqusiniliortoqarsinnaanngilaq. Ilulissammi illoqarfia imeqarfimmut killeqarfimmit ungalusimaneqarpoq, killeqarfinnilu taakkunani tamani sanaartornissaq inerteqqutaalluni.

- Allanngortoqartariaqarpoq aamma takuneqareerpoq ajornartorsiuteqartugut, tassa imeq arlaatigut ataavartumik mittarfimmut piusariaqarpoq. Aamma Ilulissat ukiorpassuarni  ineriartortinneqarneqarnerani imeqarfiup killigititaa ajornartorsiummik annertuumik pilersitsisoq, taassumap aamma takuteqqiinnarpaa eqqortumik oqariartortoqarsimagaluartoq, kisiannili imeqarfeqarniarnermut tunngasut kommunitut oqartussaaffiginnginnatsigit, taanna Namminersorlutik Oqartussat akisussaaffigimmassuk, Lars Erik Gabrielsen (S) oqarpoq.

Avannaata Kommuniani borgmesterip Lars Erik Gabrielsenip (S) kommunalbestyrelsellu mittarfittaassap imilersorfeqalernissaanut suliniuteqarnerminni Naalakkersuisunik oqaloqateqarnissaminnik pilersaaruteqareerlutik oqaatigaat. 

Suliamut tunngatillugu Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfimmut akissuteqartitsinissarput maanna sulissutigaarput.