Ilulissani Kangiata Illorsuassaa kinguaattoorfiuvoq
Ilulissani Kangiata Illorsuassaata sanaartorneqarnissaa ukiumik ataatsimik kinguartoortoq, Realdania By & Byg tusagassiuutinut nalunaaruteqarluni taama allappoq.
- Ilulissani Kangiata Illorsua illulioriaaseqarnermi pisariusutut unammillerfiusussamillu iluseqarpoq. Qaasuitsullu killeqarfiata avannaani sanaartortoqarneq tamatigut silap pissusia pissutigalugu aarlerinartoqarfiullunilu ukiup ilaa sanaartorfissaq sivikitsuuvoq. Aalajangiineq imaannaasimanngilaq pisariaqarlunili. Sanaartornissap aallartinnissaanik kinguartitsinitsigut 2019-imi sanaartornerup aallartinnissaanut suut tamaasa piareernissaat maannakkut qulakkeersinnaalerparput, Realdania By & Byg-imi pisortaaneq Peter Cederfeld oqarpoq.
AAMMA ATUARUK Nunatsinneersut Ilulissat Kangiata illorsuassaanik sanaartussasut
Politikkerit ugguarput
Suliniummik iluarsaassinerit, illuliassap titartarneri, illup sisammik napatitsisussaasa nassiunneqarsinnaasimannginneri illorsuassap sanaartorneqarnissaata kinguaattuussutigai.
- Sumiiffimmut Kangiata Illorsua assorsuaq sunniuteqassaaq - aamma suliffissaqartitsineq eqqarsaatigalugu. Kinguartoorneq akorngutitut annikitsutut uggornartutut isigaarput, kommunilli anguniagaq tunaartaraa: Tassalu, Kangiata Illorsua sanallugu naammassineqassasoq, Avannaata Kommuniani borgmesteri Palle Jerimiassen oqarpoq.
AAMMA ATUARUK Ilulissani illorsuassamik titartaasoq Venedigimi nersorneqartoq
Inuussutissarsiornermik Nukissiuuteqarnermullu Naalakkersuisoq aamma ugguarpoq.
- Soorunami kinguartoorneq ugguaraarput, illumulli naatsorsuutigisatsinnut, aammalu siunissami Kalaallit Nunaanni takornariaqarnermut Kangiata Illorsuata ilorraap tungaanut sunniutaanik tunngaviusumik tamanna allannguissanngilaq, Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq.
Ilulissat Kangiata Illorsua Namminersorlutik Oqartussat aamma Avannaata Kommunianik suleqateqarluni Realdaniamit sanaartorneqarpoq - illumi saqqummersitanut paasisitsiniaanermullu Nordea-fondenimit tapiissuteqartoqarluni. Realdaniap suliffeqarfiutaa Realdania By & Byg tassaavoq Kangiata Illorsuanik sanaartortitsisoq.
2019-imi upernaami illuliorneq aallartissaaq. Ilulissani Kangiata Illorsua 2021-mi oktobarimi atoqqaarfissiortinnissaanut piariissasoq naatsorsuutigineqarpoq.
AAMMA ATUARUK Aningaasaateqarfik Illorsuassamut 16 millionit koruuninik tapiissuteqartoq
