Aningaasaateqarfik Illorsuassamut 16 millionit koruuninik tapiissuteqartoq

Nunatsinni Ilulissani iluliarsuit alutornarnerpaapput. Iluliarsuit pillugit oqaluttuat asseqanngitsut oqaluttuarineqarfigisinnaasaat illorsuassaq, takornariat tusindilippassuit tikittagaanni avannaani 2020-mi piariissaaq.

Pilersaarut Realdaniamit, Namminersorlutik Oqartussanit, Qaasuitsup Kommunianiillu taperneqareersimavoq Nordeafondenilu maanna aamma tapiissuteqarpoq.

Aningaasaateqarfiup pilersaarut 16,4 millionit koruuninik tapiissuteqarfiginiarlugu aalajangiuppaa. Naalakkersuisut tusagassiutinut allapput.

AAMMA ATUARUK Illorsuassaq takornariartitsinerup ineriartortinneqarneranut pingaaruteqarluinnartoq

Nordeafondenimit aningaasat ilaatigut kalaallit, danskit tuluillu oqaasii atorlugit qarasaasiakkut ilinniusiortoqarnissaanut atorneqassapput.

Inuussutissarsiornermut naalakkersuisup Hans Enoksenip Nordeafondenip tapiissuteqarnera nuannaarutigaa.

- Nordea-fondenimit tapiissuteqarneq assut tulluusimaarutigaara, tamannalu Kangiani ingerlatsivimmut soqutiginninnerujussuarmik erseqqissaaginnarpoq. Tapiissuteqarnikkut saqqummiussisarnermut tunngasortaa pitsaanerulersinneqassaaq, Hans Enoksen tusagassiutinut allappoq.

Illorsuassap sanaartornera 2018-ip ingerlanera aallartinneqassaaq 2020-milu ammarneqarnissaa naatsorsuutigineqarluni. Namminersorlutik Oqartussat, Qaasuitsup Kommunia Realdanialu Illorsuarmik pilersitsinissamut suleqatigiinnissamik 2015-imi isumaqatigiissuteqarput.

AAMMA ATUARUK Store forventninger til det kommende Isfjordscenter