Ilulissani ikuallattoq ulluni arlalinni qamisarneqarsinnaasoq

Ilulissani eqqaavissuup ikuallanera ulluni arlalinni qamisarneqassaaq.

- Ikuallattoq suli qamisarneqarpoq, taannali nunap ataaniingaatsiarpoq, Jens Dahl KNR-imut oqarpoq.

Taassuma oqarnera naapertorlugu ikuallattup qaqugu qamivinnissaa suli nalorninarpoq, ullulli arlersinnaagaat oqarluni.

AAMMA ATUARUK Ikuallattumik qamisaaneq sisamanngornermi suli ingerlanneqartoq

Ikuallanneq pingasunngormat ulloqeqqanut qiteqquttoq naammattoorneqarpoq.

Qatserisartut ilungersorlutik qaminniarsarigaat upalungaarsimasut pisortaat oqarpoq.

- Ikuallattoq qanilliniarlugu gummigedit atorlugit eqqqakkat siammarterniarsaraagut, Jens Dahl oqarpoq.

Qatserisartut imermik aalleqattaarlutik illoqarfimmut ikuallattumullu uteqattaarput, taakkualu aqqutissaannik assersuisoqannginnissaanik innuttaasunut kaammattuutigineqarpoq.

Maannali imaaniit imermik qamisaasinnaanissartik sulissutigigaat, upalungaarsimasut paasissutissiipput.

AAMMA ATUARUK Ilulissani eqqaaveqarfiup ikuallannerani ulorianartumik pujortoq

Ikuallattoq eqqakkat ataanni nunap iluaniinnera qamisaaniarnermut ajornartorsiortitsivoq, anorillu sammiviisa allanngorarnera.

- Qatserisartut arlaleriarluta nuuttariaqarsimavagut pujorfigitinnginniassamata taamaaliornerlu piffissartornaqaaq, Jens Dahl oqarpoq.

Anoraa kippasimmit sanguppat illoqarfimmut pujuliulertussaavoq. Anoraalu allanngorarpoq.

Anori illoqarfiup tungaanut saqippat pujuliulerlunilu innuttaasut angerlarsimanissaannik, igalaanik matunillu matoorinissaannik Kalaallit Nunaata Politiivinit sisamanngornermi kaammattuutigineqarpoq.

Putsup qaliapaataa pingasunngormut sanilliutissagaanni maanna qaqornerulerpoq, Julie Senderovitz Bendtsen oqarpoq.

- Tamanna isumaqarpoq pujoq toqunannginnerusoq. Kisianni putsut tamarmik toqunartarput, taamaammallu igalaat matullu matunissaat innersuussutigaagut, tamannalu ilungersunartutut isigaarput, politiit pigaartuat naqissusiivoq.

AAMMA ATUARUK Ilulissani ikuallattoq qaminneqarpoq

Putsumik najuussisoorsimalluni, niaqorluleraanni, nukillaangalerluni, merianngulluni iluaalleqqajaalluniluunniit taava Ilulissat napparsimmavianut 943211-mut sianertoqarsinnaavoq.

Allanillu paasissutissaateqaraanni Ilulissani politiit 70 14 22-mut sianerfigineqarsinnaapput.

Ikuallanneq qanoq aallartissimanersoq suli ilisimaneqanngilaq.