Ikuallattumik qamisaaneq sisamanngornermi suli ingerlanneqartoq

Ippassaq nutaarsiassaqartitsinitsinni oqaatigaarput Ilulissani qatserisartut innermik takusaqarsinnaanngitsut, taamaattorli ikuallaffiusoq suli kissartoq, maannali uuttortarneqarnerani kissaqqissimasoq paasineqarpoq, tamannalu nunap ataaniissinnaavoq.

Kalaallit Nunaanni politiit pigaartuisa naalagaat, Julie Senderovitz Bendtsen, tusagassiuutinut sisamanngornermi unnukkut allappoq.

Ilulissani qatserisartut imermik atuingaatsiarlutik eqqaavissuarmi suli qatseripput.

Biilit usisartut imermik aalleqattaarlutik uteqattaarlutik ulappupput, taakkulu innuttaasunik ataqqineqarnissaat kaammattuutigineqarpoq, aqqutissaanik assersornaveersaaqqullugit.

Biilit usisaatit sukkanerusumik aallerlutillu pajuffimminnut apuutilertorneruniassagamik tungujortumik qullileqarput ik eqattaartumik.

Anoraa kippasimmit sanguppat illoqarfimmut pujuliulertussaavoq. Anoraami saqittaqattaartarpoq. Anoraalu saqilluni illoqarfiup tungaanut pujuliulerpat innuttaasut angerlarsimanissaannik, igalaanik matunillu matoorinissaannik Kalaallit Nunaata Politiivinit kaammattorneqarput.

Taamaammat innuttaasut eqqaavissuarmut qanillattunnginnissaat suli kaammattuutigineqarpoq, taamatullu qatserisartunut inissaqartitsinissaat ataqqinninnissaallu piumasarineqarluni.

Pujoq pingasunngormat pujumut sanilliutissagaanni maanna qaqornerulersoq, Julie Senderovitz Bendtsen oqarpoq.

- Tamanna isumaqarpoq pujoq toqunannginnerusoq. Kisianni putsut tamarmik toqunartarput, taamaammallu igalaat matullu matunissaat innersuussutigaagut, tamannalu ilungersunartutut isigaarput, politiit pigaartuat naqissusiivoq.

- Putsumik najuussisoorsimalluni, niaqorluleraanni, nukillaangalerluni, merianngulluni iluaalleqqajaalluniluunniit taava Ilulissat napparsimmavianut 943211-mut sianertoqarsinnaavoq.

Allanillu paasissutissaateqaraanni Ilulissani politiit 70 14 22-mut sianerfigineqarsinnaapput.