Ilulissani GU-qalernissaa tapersersorluarneqarpoq
Ilulissani GU-qalernissaa imaluunniit timersornermut ilinniarfeqalernissaa qanilliallappoq siunnersuut Inatsisartunit tamanit taperserneqarmat.
- Atassummit qularutiginngilarput timersornermik ilinniarfimmik ilinniarnertuunngorniarfimmilluunniit pilersitsineq nunatsinni timersornermut angisuumik siuariaateqartitsissammat, Knud Kristiansen, Atassutip oqaaseqartartua ilaatigut ippassaq taama oqarpoq.
Oqaaseqarfigisaa tassaavoq Knud Fleischerip, KP, Ilulissani timersornermik ilinniarfimmik imaluunniit ilinniarnertuunngorniarfimmik pilersitsisoqarnissaa pillugu Naalakkersuisut misissuinissamik peqqullugit siunnersuutaa.
- Siunnersuut tamakkiisumik tapersersorparput, innersuussutigaarpullu ataatsimiititaliami suliarineqassasoq, Knud Kristiansen erseqqissaavoq.
Ilulissani arsaattarfimmik ivigaaraasalimmik pilersitsinissamik siunertaqarluni suliniartoqarpoq. GU-mik pilersitsinissaq ivigaaraasalimmillu arsaaffiliornissaq ataatsimoortinniarneqarlutik.
Ivigaaraasalimmik arsaaffiliorniat misissortikkusuppaat ilinniarnertuunngorniartut ilinniarfissaannik imaluunniit timersornermik ilinniarfimmik pilersitsinissamut periarfissaqarnersoq, tamatumani arsaattarfik ivigaaraasalik ilanngunneqarluni.
Demokraatit oqaaseqartuata Jørgen-Ole Nyeboep erseqqissarpaa Demokraatit siunnersuutaat tunngavigalugu arsaattarfiit ivigaaraasanik qallikkat pilersaarusiornissaannut, ilaatigut Ilulissani, aningaasanut inatsimmi ilanngussisoqareersimammat.
Oqaaseqartartullu erseqqissarpaa Ilulissani GU-p immikkoortortaanik ilinniarfeqalernissamut imaluunniit timersornermik ilinniarfeqalernissamut ivigaaraasanik qallikkamik arsaattarfeqarnissaq aalajangiisuussanngimmat.
- Demokraatini siunnersuuteqartoq isumaqatigaarput, oqarmat tamanna iluaqutissaqarluartoq, Jørgen-Ole Nyboe erseqqissaavoq.
Siumumit siunnersuut tapersersorneqarpoq.
Siumulli Naalakkersuisut siunnersuummut maannakkut tapersersuinerat eqqumiiginartinneqarpoq. Siumumut paragraf 37 tunngavigalugu Naalakkersuisut 2011-mi akissuteqarsimammata, Naalakkersuisunit ilinniarnertuunngorniarfiit ilassallugit pilersaaruteqatoqanngitsoq.
- Taamaattoq Siumumit misissuinissaq qularnaatsumik tapersersorparput, Naalakkersuisulli imminnut akuerisaqattaattarnersuat, partimi sorlermiinneq apeqqutaatillugu ernumartoqartipparput, Kristian Jeremiassen erseqqissaavoq.
Inuit Ataqatigiinniit Naalakkersuisut siunnersuummut akissutaat ilalernartinneqarpoq.
Naalakkersuisut siunnerfigimmassuk ilinniarfiit imminnut siunissami tapersersoqatigiinnerusassasut. IA-li isumaqarpoq, Ilulissani GU-mik pilersitsisoqassappat, GU Persorsaanermullu Ilinniarfik imminnut tapersersoqatigiissinnaassasut.
- Ilinniarfiit tapersersoqatigiittut ilinniakkanut pitsaanerulersitsilluinnarsinnaapput, partiip oqaaseqartartua Hans Aronsen erseqqissaavoq.
Siunnersuut aappassaanneerlugu maajip 25-ani oqaluuserineqassaaq.
