Ilulissani GU-qalernissaa qanilliallappoq
![](/sites/default/files/styles/image_934x467/public/article_images/bymidte630_2.jpg?itok=7Dmu52SG)
Ilulissani suliniartoqarpoq arsaattarfimmik ivingaaraasalimmik pilersitsinissamik siunertaqarluni suliniuteqartunik. Maannalu GU-mik pilersitsinissaq ivigaaraasalimmilu arsaaffiliornissaq ataatsimut atorniarneqalerput.
Ivigaaraasalimmik arsaaffiliorniat misissortikkusuppaat ilinniarnertuunngorniartut ilinniarfissaannik imaluunniit timersornermik ilinniarfimmik pilersitsinissamut periarfissaqarnersoq, tamatumani arsaattarfik ivingaaraasalik aamma ilanngunneqassasoq.
- Ilinniarnertuunngorniarfik imaluunniit timersornermik ilinniarfik Ilulissaniittoq nunatsinni ilinniarfioreersunut ilapittutaasinnaakutsuussaaq, Knud Fleischer siunnersuummini ilaatigut erseqqissaavoq.
Siunnersuullu Naalakkersuisut ilinniartitaanerup siuarsarneqarnissaata suliniutigineqarneranut tulluartuuvoq, anguniarneqarmat inuusuttut ukioqatigiiaakkuttaartut 70 procentii inuussutissarsiutigisinnaasaminnik 2025-mi allagartartaarsimassasut.
Ilinniartitaanermut Naalakkersuisoq Palle Christiansen erseqqissaavoq tamanna iluatsissappat inuusuttut amerlanerungaartut ilinnialertariaqartut. Unnerlunilu Namminersorlutik Oqartussat inuusuttunut ilinnialersussanut inissaqartitsinikkut pitsaasumillu ilinniartitaanissamut isumaginnissasut.
- Taamaattumik 2025-mut anguniarneqartoq piviusunngortinneqassappat ilinniarnertuunngorniartut amerlanerit ilinnialereersimanissaannut inissaat isumagisariaqartariaqassapput, Palle Christiansen akissummini ilaatigut taama erseqqissaavoq
Knud Fleischerip siunnersuutigaa Ilulissani ilinniarnertuunngorniartut ilinniarfissaannik timersornermilluunniit ilinniarfeqalernissamik tunngavissaqarnersoq Naalakkersuisut misissussagaat.
Ilinniarnertuunngorniarfiit nutaamik aaqqissuussiffigineqarnissaannut tunngatillugu, ilinniartut sammisanut aalajangersimasunut toqqaanissaminnut periarfissaqassapput, tamatumani timersorneq ilaalluni.
- Taamaattumik pisariaqarsinnaaassaaq timersornermik ilinniarfik ilinniarnertuunngorniartut ilinniarfiannut atasoq pilersisinnaassallugu. Ilinniarnertuunngorniartut timersornermik sammisaqarnissaannut periarfissaqartinneqarsinnaassallutik. Tamannalu misissuiffigineqarsinnaassaaq, Palle Christiansen erseqqissaavoq.
Siunnersuut siullermeerlugu ataasinngorneq apriilip 30-ani oqaluuserineqassaaq.