Ilulissani Eqqumiitsulianut Katersugaasivik eqqumiitsuliortunit tatigineerukkaluartoq inatsisit malinneqarsimapput

Eqqumiitsuliortut Kattuffiata KIMIK-up eqqumiitsuliortut arlallit suliaat saqqummersitsinermi maanna pisumi peqataatinneqarnerat pillugu inuttaasa ilisimatinneqarsimannginnerat uparuarpaa. Kisianni eqqumiitsuliat pillugit oqaluttuarisaanermik ilisimatusaateqartoq oqarpoq katersugaasivik inatsisinik unioqqutitaqanngitsoq.

Allattoq Ann-Sophie Greve Møller

apriilip 27-at 2024 11:37

Nutserisoq Najaaraq Egede

Ilulissani Eqqumiitsulianut Katersugaasivik ulluni makkunani uparuartorneqalaavissorpoq. Uperuartuinerit eqqumiitsuliortut arlallit suliamik, saqqummersitsinermi Backbone’imik taasami ulluni makkunani pisumi, ilaatinneqarnerannik ilisimatinneqarsimannginnerminnut uparuaaneraat.

Saqqummersitsineq kalaallit arnat eqqumiitsuliortutut suliaannik eqqumiitsuliamikkullu oqaatigiumasaannik nersorinninniarneruvoq. Arnat 26-t ukiuni 24-ni kingullerni suliarisartagaasa ilaat saqqummersitsinermi takuneqarsinnaapput.

Eqqumiitsuliortut maannamut arfineq-marluk, KNR-imit oqaloqatigisatta, saqqummersitsinermut suliamik ilaatinnissaat pillugu ilisimatinneqarsimannginnertik, arnanik eqqumiitsuliortunik nersorinninniarluni saqqummersitsinermut assortuuttuusoq oqaatigaat. Kattuffik KIMIK taamaattumik Ilulissani Eqqumiitsulianut Katersugaasivimmik tatiginnissinnaajunnaarnerminik aamma nalunaarpoq.

Aamma atuarukEqqumiitsuliortut Ilulissat Katersugaasiviannut tatiginnikkunnaarput

Saqqummersitsisoqassatillugu nalinginnaasuuvoq, eqqumiitsuliortut saqqummersitsinerup ammaanersiorneqarneranut atatillugu qaaqqusissummik imaluunniit suliaasa ilaatinneqarfigisaannik saqqummersitsisoqalernera pillugu ilisimatitsissummik nassiussivigisarnerat. Malene Vest Hansen, Københavnip Universitetiani eqqumiitsuliornerup oqaluttuassartaanik ilisimatusarfimmi - Institut for Kunst- og Kulturvidenskab-imi – ilinniartitsisuusoq taama oqarpoq.

Taamaakkaluartoq eqqumiitsuliortut katersugaasivimmi sulisut eqqumiitsuliortut arlallit suliaasa ataatsikkut saqqummersinneqarnerannut suleqataatinneqarneq ajorput, aamma nassuiaavoq.

- Nunarsuarmi saqqummersitsinissanut atatillugu eqqumiitsuliortut – suliaannik tuneriigaannik ilaqartitaqassagaluaraanniluunniit - nalinginnaasumik akuersissummik piniarfineqarneq ajorput.

- Eqqumiitsuliaq tunereeraanni, pisisup, pisiani qanorluunniit pisinnaavaa, Malene Vest Hansen, ullutsinni eqqumiitsulioriaatsimik aamma saqqummersitsinermi qulequtarisaq sammisarluunniit tunngavigalugu eqqumiitsulianik toqqartuinissamik ilisimatusartoq erseqqissaavoq.

Qaaqqusissut inissaminiissimassagaluartoq

Taamalli erseqqissaagaluarluni Malene Vest Hansen oqarpoq, Ilulissani Eqqumiitsulianut Katersugaasiviup ammaanersiornermut atatillugu eqqumiitsuliortunik qaaqqusisimannginnera qaqutigoortuusoq. Tassami nammineq takusimanngisaannarpaa.

- Ammaanersiornermut atatillugu ilasseqatigiissitsinermulluunniit qaaqqusineq nalinginnaanerusoq pissusissamisoornerullunilu, ilisimatusartoq oqarpoq.

Suliaq sumut tunngava?

Eqqumiitsuliortut arfineq-marluk, naammagittaalliuummik KNR-imut anngussipput, naammaginngisaat tassaalluni Ilulissani Eqqumiitsulianut Katersugaasivimmi ulluni makkunani saqqummersitsinermut takuniarneqarsinnaasumut Backbone-mik taasamut atatillugu suliamik ilaanissaannik aperineqaqqaarsimannginnertik ilisimatinneqaqqaarsimannginnertillu. Saqqummersitsineq marsip ulluisa 28-anni ammarmat atitik ilaasut aatsaat paasivaat.
Eqqumiitsuliortut marluk naluaat suliatik sorliit saqqummersitsimermi ilaatinneqarnersut, tassami Ilulissani Eqqumiitsulianut Katersugaasivimmut suliaminnik tunisaqarsimanngisaannaramik.
Eqqumiitsuliortut sisamat oqarput Ilulissani Eqqumiitsulianut Katersugaaviup pisortaanut Andreas Hoffmannimut suliaminnik tunisaqarnikuullutik, tupaallaatigaluguli suliamik katersugaasivimmi maanna saqqummersitsinermut ilaatinneqarnerat.
Eqqumiitsuliortut ilaata oqaatigivaa, suliami ilaat Ilulissani Eqqumiitsulianut Katersugaasiviannut ukiualuit matuma siornagut tunisimallugu, kisianni saqqummersitsinermi immikkut qulequtaqartinneqartumut ilaatinnissaanik aperineqarsimanani.
Eqqumiitsuliortut Kattuffiat KIMIK eqqumiitsuliortut arfineq-marluk uparuaataat illersorlugu Ilulissani Eqqumiitsulianut Katersugaasivimmik takutiginnikkunnaarluni nalunaarpoq.
Saqqummersitsineq Backbone kalaallit arnat eqqumiitsuliortut taakkulu nipaasa tusartinnissaat eqqumiitsuliaasa assigiinngitsut eqqumiitsuliortunit 26-nit suliarineqartut – ukiuni kingullerni 24-ni suliarineqarsimasut - saqqummersinnerisigut tusartinniarneqarpoq. Taamaammat eqqumiitsuliortut tusarniarneqaqqaarneqarsimannginnertik naammaginngilaat.
Eqqumiitsuliortut ilaasa sisamat suliamik saqqummersitsinermit peerneqarnissaannik piumasaqarput.
Ilulissani Eqqumiitsulianut Katersugaasivimmi pisortaq, Andres Hoffmann, KNR-imut oqarpoq, eqqumiitsuliortunut attaveqarnerminnik pitsaanerulernissaannik suliniuteqassallutik.
Katersugaasiviup eqqumiitsuliat saqqummersitassatut toqqarneqartut, saqqummersinneqaannarnissaat aalajangerneqareersoq, naak eqqumiitsuliortut peerneqarnissaat piumasarigaluaraat.

Allisiguk

Eqqumiitsuliortut, KNR-imit oqaloqatigineqartut tamarmik, suliamik saqqummersitsinermut ilaatinneqarnerat pillugu – saqqummersitsineq aallartimmat marsip ulluisa 28-anni aatsaat paasisaqarput.

Eqqumiitsuliortut marluk katersugaasivimmut suliaminnik tunisaqanngisaannarsimapput, suliarinikuusamillu arlaat sorliit saqqummersitami ilaatinneqarnersut sianiginaguluunniit. Eqqumiitsuliortut sisamat katersugaasiviup pisortaanut Andreas Hoffmannimut suliaminnik ukiualuit matuma siornagut tunisaqarnikuusimapput.

Eqqumiitsuliortut KIMIK-llu saqqummersitsineq sioqqullugu katersugaasivimmit ilisimatinneqarsimannginnerminnik uparuaapput – pingaartumik eqqarsaatigalugu qulequtaqartinneqarmat arlalillu suliaannik ataatsimut saqqummersitsinerummat.

Inatsimmit illersugaasoq

Inatsisilli misissoraanni, Ilulissani Eqqumiitsulianut Katersugaasiviup eqqumiitsuliortut ilisimateqqaanngikkaluarlugit saqqummersitsisinnaanera ajoriffissaqartinneqanngilaq. Assilialiorlutik eqqumiitsuliortartut Kattuffianni Danmarkimi - Billedkunstnernes Forbund i Danmark – allaffimmi pisortaq, Klaus Pedersen taama oqarpoq.

- Suliat tunigaanni naatsorsuutigineqariissaaq suliap tamanut takusassineqarsinnaanera. Taamaaliornissaq malittarisassaniinngilaq, Klaus Pedersen, inatsisilerituutut aamma ilinniarsimasoq oqarpoq.

Eqqumiitsuliortoq katersugaasivimmut eqqumiitsuliaminik tunisaqarsimanngikkaluarpalluunniit saqqummersitsinermi suliaanik ilaatitsinissaq aporfissartaqanngilaq.

Eqqumiitsuliortulli piginneqqaartussaanerat, suliaminnut suli akisussaaffeqarsinnaatitsivoq. Kisianni aatsaat tamanna atuutissaaq suliaa assilillugu suliaqartoqarnerani, Klaus Pedersen oqarpoq, nangillunilu:

Aamma atuaruk Eqqumiitsulianik katersugaasivik aalajangiusimaannartoq: Eqqumiitsuliat akerleriiffiusut nivingatiinnarneqassapput

- Piginneqqaartussaatitaaneq eqqumiitsuliaq, soorlu TV-mi, atuakkami atuagassianiluunniit atorneqarpat aatsaat isumaqarnerpaanngortarpoq – eqqumiitsuliamik sanasoq ilisimatinneqartussaammat. Kisianni katersugaasivinni assigisaanniluunniit takutitsineq inerteqqutaanngilaq, oqarpoq.

Klaus Pedersenip oqarnera naapertorlugu, eqqumiitsuliortut arlallit suliaat ataatsikkut saqqummersitsissutigissatillugit – eqqumiitsuliortut ataasiakkaarlugit ilisimatinniarlugit attavigisariaqanngitsut pisariaqanngilaq – naak, taamaaliorneq ileqqorissaarnerussagaluartoq.

Inatsisinili atuuttuni eqqumiitsuliortoq ilisimateqqaarnagu suliaanik ilaatitsinissamik Ilulissani Eqqumiitsulianut Katersugaasiviup aalajangersimanera unioqqutitsinertut taaneqarsinnaanngilaq. Klaus Pedersen erseqqissaavoq.