Eqqumiitsuliortut Ilulissat Katersugaasiviannut tatiginnikkunnaarput
Eqqumiitsuliortut kattuffiata Kimiup Ilulissani Katersugaasivik isornartorsiorpaa. Nunatsinni eqqumiitsuliortut arlallit katersugaasivimmut tatiginnikkunnaarnerat, Kimiup siulittaasuata Kristine Spore Kreutzmannip oqatigaa.
Eqqumiitsuliortut tallimat paasitinneqaqqaaratik eqqumiitsuliami saqqummersitsinermi Backbonemik taaneqartumi Ilulissat Katersugaasiviani saqqummersinneqarnerat, sapaatit akunnerata siuliani KNR-imut oqaluttuarereeraallu kattuffik isornartorsiuivoq.
- Eqqumiitsuliortut akuersisinneqaqqaaratik, saqqummersitsinissamut tunngasumik tusagaqarsimanatik saqqummersitsinissamulluunniit qaaqqusissummik tigusaqarsimanatik suliaasa saqqummiunneqarnerat akuerineqarsinnaanngilaq. Tamanna eqqortuunngilaq, Kristine Spore Kreuzmann nammineq aamma eqqumiitsuliortuusoq taama oqarpoq.
Saqqummersitsineq Backbone maanna ammasoq, arnanik eqqumiitsuliortunik nersorinninniarnermik siunertaqarpoq, arnallu 26-t eqqumiitsuliaat tassani saqqummersinneqarput.
Saqqummersitsinerulli eqqumiitsuliortunit arlalinnik ilisimaneqannginnera siunertamut ajalusoortitsisoq, Kristine Spore Kreutzmann oqarpoq.
- Saqqummersitsinissami taamaattumi peqataatinniarneqartut qaaqquneqarnissaat pissusissamisoorpoq. Aqqi atorlugit nalusaannik saqqummersitsiinnartoqarsinnaanngilaq, taamaammat katersugaasivimmut tatiginnikkunnaarpugut, taanna oqarpoq.
Eqqumiitsuliat sorliit?
Eqqumiitsuliortut isornartorsiuisut amerlipput.
Maria Bach Kreutzmann isornartorsiuisunut ilaavoq. Saqqummersitsinermi marsip 28-ani ammarneqartumi saqqummersitsisut akornanni atini ilaasoq taassuma qanittukkut tusarpaa.
Eqqumiitsuliamili sorliit Ilulissani Katersugaasivianni nivinngarneqarsimanerat eqqumiitsuliortup ilisimanngilaa. Taannami eqqumiitsuliaminik katersugaasivimmut tassunga tunisaqarsimanngilaq.
- Saqqummersitsinermi kalaallit arnat eqqumiitsuliortut tusaaneqarnissaanik siunertaqartumi peqataanissatsinnik aperineqarsimannginnerput paasiuminaatsorujussuuvoq, Maria Bach Kreutzmann oqarpoq. Taanna inuit kulturianni kalaallit oqaluttuatoqaanni toornat, uumasut inuunngitsullu pillugit ilaatigut atuakkiaqarpoq "Bestarium Groenlandica"-mik taasaminik.
Eqqumiitsuliortoq Buuti Pedersen pisoq pillugu aamma tupigusuppoq. Taassuma saqqummersitsineq pillugu nassuiaat atuaramiuk saqqummersitseqataanini nalaatsortumik paasivaa.
Atuareerlugu Ilulissani Katersugaasivimmut allappoq sunik saqqummersitsinerluni paaserusullugu aperaluni. Eqqumiitsuliani glassiusoq ukiut arfinillit matuma siorna katersugaasivimmi pisortaasumut Andreas Hoffmannimut tunisimasani saqqummersinneqartoq, katersugaasiviup akissutaani paasisimallugu taanna oqaluttuarpoq.
- Eqqumiitsuliortumut attaveqaqqaarani saqqummersitseqataasoqarnera aatsaat misigaara. Sunut peqataanera ilisimarusukkaluarpara, Buuti Pedersen oqarpoq.
Utoqqatsertariaqaraluarput
Arnat eqqumiitsuliortut saqqummersitsinermi sammineqarnerat ilisimaneqarnerulernissaanillu siunertaqarneq ajunngitsuugaluarlunilu aperineqarsimanissaq pisariaqaraluartoq Maria Bach Kreutzmann isumaqarpoq.
Taamaammat eqqumiitsuliortut saqqummersitseqataarusunnerminnik aperineqartuugunik akuersisimanissaat taassuma ilimagilluinnaraluarpaa.
- Saqqummersitsinerup siunertaa torrassuuvoq. Arnat saqqummersitseqataasut peqataajumannginnissaat ilimaginngilara, saqqummersitseqataaneq ataqqinartutut isigineqartarmat, oqarpoq nangillunilu:
- Tusarniarneqarsimannginnerpulli ajornartorsiutaavoq. Eqqumiitsuliat katersugaasivimmit pigineqaraluarpata namminerluunniit pigineqaraluarpata apeqqutaanngilaq, uatsinnut saqqummersitseqataasunut attaveqaqqaarnissaq perorsarsimarpalaartumik pissuseqarnerussaaq.
Akuersisinneqaqqaaratik eqqumiitsuliami Ilulissat Katersugaasiviani saqqummersinneqarnerat eqqumiitsuliortut Lisbeth Karline Poulsenip, Paarma Brandtip, Cecilie Christiansenip aamma Bolatta Silis-Høeghip sapaatit akunnerata siuliani KNR-imi isornartorsiorpaat. Eqqumiitsuliamillu saqqummersitsinermiit peerneqarnissaat kingorna piumasaraat.
Kissaartertillu katersugaasivimmit piviusunngortinneqarsimasoq taakku oqaluttuarput. Kimiulli siulersuisuini ilaasortaq Lisbeth Karline Poulsenip oqarnera naapertorlugu eqqumiitsuliat pingasut saqqummersitsinermi suli takuneqarsinnaapput.
Taamaammallu Kimik Ilulissani Katersugaasivimmut kaammattuutissaqarpoq:
- Utoqqatsertariaqaraluarput. Eqqumiitsuliortut oqariartuutaat tusaaniartariaqaraluarpaat. Eqqumiitsuliortut saqqummersitseqataajumanngitsut ataqqineqartariaqarput eqqumiitsuliaallu peerneqarlutik, Kristine Spore Kreutzmann oqarpoq.
KNR Ilulissani Eqqumiitsulianik Katersugaavisik isornartorsiuineq pillugu apersuinissamut periarfissaqarsimanngilaq. Tamanna ullumi kingusinnerusukkut pissaaq.
