Ilulissani ataatsimiinnissap piffissalernera akunnappoq
DANMARK: Eqqortumik piffissaliisoqarnissaa pingaarnerpaasoq oqaatigineqartarpoq. Tamannalu danskit nunanut allanut ministeriata Martin Lidegaardip (R) Ilulissani nalunaarummik atsiueqataasut ministerit ataatsimeeqatigeeqqinnissannut aggersarneqarnissaannik nunanut allanut ministeritut siulerisami siunnersuutaanut atatillugu malikkusuppaa.
Siunnersuuteqartorlu tassaavoq nunanut allanut ministeriusimasoq Per Stig Møller, KNR-imit qanittukkut apersorneqarluni danskit naalakkersuisuisa Issittumi siuttuusariaqarnerannut aammalu nunat nalunaarummik atsiueqataasut tallimaasut - tassalu Kunngeqarfik Danmark, Norge, Rusland, Canada USA - aamma Arctic Fivemik taaneqartartut - ataatsimeeqatigeeqqinnissaannut kaammattuuteqartoq.
Maannali nunanut allanut ministeriusup piffissaq akunnagaa.
- Per Stigip oqaatigisaa pitsaasoraara. Piffissaliussarli (ataatsimeeqqinnissamut, aaqq.) soorunami eqqartorneqarsinnaavoq. Rulandimut attaveqarnitta maannakkorpiaq pitsaavallaannginnera taamatut oqarninnut aallaavigaara. Aamma piffissami kingunissalimmik eqqartueqatigiiffigisinnaasatsinni taamatut ataatsimiittoqarnissaa orniginartinneruara. Tamannami maannakkorpiaq ajornakusuussanasorigakku, Martin Lidegaard KNR-imut taama oqarpoq.
Pisussaaffigineqartut apeqqutaatinnagit
Per Stig Møller naapertorlugu Arctic Fivet katersuuteqqinnissaat pisariaqarpoq, Issittumi Siunnersuisooqatigiit ukiuni arlaqalersuni annertuallaalersimammata maannalu nunanit Issittup avataaniittunit peqataaffigineqalersimallutik. Nunallu taakkua, nunanut issittup imartaanut sinerialinnut naleqqiullugit suliani issittumut tunngassuteqartuni pisussaaffiliunneqartunut pimoorusivallaanngitsut, Stig Møller isumaqarpoq.
Lidegaardip tamanna ilaatigut isumaqataaffigaa.
- Ilumoorpoq ajornartorsiutit ilaat taakku tallimat akornanni (Arctic Fivemut ilaasut, aaqq.) eqqartussallugit tulluarnerummata, ilaasortaasut arfineq-pingasut (nunat Issittumi Siunnersuisooqatigiinnut ilaasortaasut, aaqq.) akornanni eqqartornerinit, oqarpoq nangillunilu:
- Issittumi Siunnersuisooqatigiinni assigiinngitsorpassuit sammineqartarput, tamakkulu naalagaaffinnut issittup imartaanut sinerialinnut tallimaasunut tunngatillugu aamma allaanerullutik. Taamaammat soqutigisatta nukittorsarnerisigut nunat Danmarkitut Kalaallit Nunaattullu ittut siunnersuisooqatigiinni isumaqatigiinniarnerni nukittunerusumik inissisimalersinneqarsinnaapput.
Issittoq pillugu oqaloqatigiinnerit suli ingerlapput
Ukrainemi saqitsaattoqaraluartoq Issittumi nunat issittup imartaanut sineriallit tallimaasut, Rusland ilanngullugu, imminnut neriorsorsimapput Issittoq pillugu suleqatigiinneq ingerlatiinnarneqassasoq - maannakkulli suleqatigiinneq tamanna atorfilittatiguinnaq ingerlanneqarluni.
Taamaammat ministerikkoortumik ataatsimiinnissamut aggersaanissaq nalorninaateqarsinnaasoq, Martin Lidegaard isumaqarpoq.
- Taamaammat isumaliutigeqqissaartariaqarpoq, ministerikkoortumimmi naapittoqassappat tamanna pissutsit maannakkutut inissisimatillugit ilungersunartupilussuusinnaammat (…). Tamannalu pissutigalugu Ilulissani nalunaarummik atsiueqataasut ataatsimiiseqqinnissaat qaammatialunni imaluunniit saqitsaattoqarnera qanoq pissanersoq apeqqutaatillugu sivisunerusumik utaqqisinneqartariaqarsoraara.
