Iluarsaaneq sipaarutaasinnaavoq

- Aningaasammi taakku inuppassuit iluaqutigissaqqaarpaat, Birthe Kielsen, A/S INI-p atuisartunut sullissiviani pisortaq taama unnersiorpoq.

BSU aqqutigalugu illuliat 2006-miit 2008-p tungaanut A/S INI-p pitsaassusaannik misissuiffiga. Illullu taakku pitsaassutsimikkut assigiinngeqisut taamanikkut paasinarsisimalluni.

- Inuimmi ilaasa illutik soorunami paarilluarpaat, ataavartumillu aserfallattaaliisarlutik. Inuilli ilannguisa illutik pisortanit isumagineqartussatut naatsorsuuttarpaat, illullumi taakkorpiaat tassaapput nutarterneqarnissamik maanna pisariaqartitsinerpaajusut, Birthe Kielsen oqarpoq.

BSU-p illuutaanut aningaasaliissutaasartut ukiut marluk matuma siorna maanna Naalakkersuisuusut unitsippaat. Illulli aserfallakkiartuinnarmata suliassat minnerulersimanngillat. Illorpassuimmi oqorsarneqarneri nungullavissimapput, allatigullu nutarsarneqartariaqalersimallutik.

- Illut taakku amerlanerit namminerisamik uuliatortumik kiassaateqarunnaarlutik qitiusumit kiassaateqarfimmit kiassarneqartalersuuppata iluaqutaassagaluaqaaq, tamatumalu saniatigut illut taakku igalaavi oqorsaataalu taarsersorneqarsinnaasuuppata amerlanerpaanut iluaqutaassagaluaqaat, Birthe  Kielsen oqarpoq.

BSU aqqutigalugu illuliat ukiut tallimakkaarlugit nutarsaavigineqarnissaannut 100.000 koruuninik tapiiffigineqarsinnaaneri siornatigut periarfissaasimagaluarpoq.

BSU aqqutigalugu illulianut tapiissutaasalertussat pillugit siunnersuut ullumi marlunngornermi inatsisartuni eqqartorneqassaaq.