Illuatungiuliuttut: Aleqa tunuartariaqaraluarpoq

Tamanna tamanut nalunaarutigineqareersorlu, Naalakkersuisut siulittaasuat, Aleqa Hammond tusagassiortunik katersortitsivoq, arfininngormat unnukkut nalunaaqutaq arfineq marlup qeqqartorlu.

Tamanna pillugu Inatsisartuni partiit illuatungiliuttut ullaatungaani paasiniaavigaagut, qanoq qisuariaatissaqarnersut paasiniaavigalutigit.

- Innutaasut oqarput tassa naammaleqaaq.

Parti Naleqqap siulittaasua oqarpoq, kanngusuutigalugu Siumumi ilaasortat maanna anngaaginnartunngorsimaneri.

Aamma atuaruk Kuupik: Pisup taamatut kinguneqartinnissaa pissusissamisuuinnarpoq

Inuit Ataqatigiit politikkikkut oqaaseqartartuata oqaatigaa, Naalakkersuisut siulittaasuat tunuartinneqartarisaqartoq taassuma inatsisinik maleruagassanik unioqqutitsisimanera pillugu.

Sapaatip akunnerata naanerata pisoqarfioqisullu kingorna, partiit suli aalassassimaaqaat, tamannalu malugineqarsinnaavoq partiit illuatungiliuttut ullaatungaa paasiniaavigigatsigit.

- Tassa naammaleqaaq, Demokraatit siulittaasuat, Anda Uldum oqarpoq.

- Innuttaasut oqarput, tassa naammaleqaaq. Tamanna tusaatissatut tiguneqartariaqaraluarpoq tusaanngitsuusaaginnarnagu, Anda Uldum oqarpoq.

Aamma atuaruk Kuupik V. Kleist Inatsisartunit tunuarniuteqarpoq

Siumumi ilaasortaasimasoq aamma Naalakkersuisunut siulittaasuusimasoq maannalu Parti Naleqqap siulittaasua, Hans Enoksen oqarpoq Siumup ilaasortai anngaaginnartunngorsimasut.

- Uanga kanngusuppunga, ilumoornermik tunngaveqarlunga suleqataasimasoralunga, sunnaaffa salloqittagaallunga uukkapaatinneqarsimallungalu. Siumumi ilaasortat maanna anngaaginnartunngorsimapput, tamannalu namminneq nalilertariaqarpaat, Hans Enoksen oqarpoq.

Inuit Ataqatigiit politikkikkut oqaaseqartartuata, Aqqaluaq B. Egedep oqaatigaa, Naalakkersuisuugaluaraanniluunniit inatsisinik unioqqutitsisoqarsinnaanngimmat, taamaattumillu Aleqa Hammond tunuartariaqartoq oqaatigalugu.

- Naalakkersuisut siulittaasuat tunuartinneqartariaqarpoq, tassami inatsisinik unioqqutitsivoq. Naalakkersuisut kikkuugaluarunilluunniit taamaaliortussaatitaanngillat. Assersuutitut taaneqarsinnaavoq, innuttaasut soorlu inigisaminnut akiitsoqarsimappata akileerusunnatillu, taava taakku inigisaminnit anisitaasarput. Taamaattumik Naalakkersuisut  akiligassaminnik kinguartitseqattaalaaginnarsinnaanngillat isummatik malillugit.

Inuit Ataqatigiit politikkikkut oqaaseqartartuat, Aqqaluaq B. Egede oqarpoq.