Akerliussutsimik takutitsineq: Inatsisartunut qinersisoqarnissaa piumasaqaatigigaat

Inatsisartoqarfiup saani arfininngorpat nalunaaqutaq 15.00 akerliussutsimik takutitsinissamut aggersaasoqarpoq.

Aaqqissuisup, Juulut Jeremiassenip qinersisoqarnissaata nalunaarutigineqarnissaa piumasaraa.

- Akerliussutsimik takutitsinissaq angorusuppara naalakkersuisut inatsisartut uppitinneqarnissaat angorusullugu, taanna oqarpoq.

- Kalaallit nunaanni aqutsineq aatsaat taamak killeqartigimmat.

Juulut Jeremiassen pingaartumik sisamanngornermi ataatsimiinnermi naalakkersuisunut kiisalu Nivi Olsenimut (D) tatiginnikkunnaarnermik nalunaaruteqartoqarnera pissutigalugu iliuuseqarnialerpoq.

- Kingullertigut Inatsisartuni ataatsimiinnerit torinngitsumik pisuutitsisaqattaarnerit ingerlanneqarnerat avaanngunartutut uanga nammineerlunga isigigakkit. 

Ulluinnarni inuunermit ungasittut

Juulut Jeremiassenip politikikkut oqallinnernut malinnaanermini innuttaasunut ungasittoqartoq misigisimavaa.

- Kalaallit annerusumik malinnaatinneqannginnerput, inatsisartoqarfimmi naalakkersuisullu angalaannarnerat suliassatik qimaannarlugit.

Inatsisartunut kingullermi 2025-mi marsip aqqarnanni qinersisoqarpoq. Tamatuma kingorna partiit tamarmik Naleraq minillugu naalakkersuisooqatigiilerput. Siumut naalakkersuisoqatigiinnit ukioq ataaseq qaangiuttoq marsimi tunuarpoq. Assi © : KNR / Markus Valentin

Aaqqissuisup akerliussutsimik takutitsineq politikerit akisussaaffimminnik iluamik tigusinissaannik oqariartuutaasinnaassasoq neriuutigaa.

- Naalakkersuisut suliassatik naammassisariaqaraluarpaat tamakkiisumik avaqqutaarinatik.

- Taavalu taassuma kingorna naalakkersuisoqatigiit iluanni pisuutitsinianit partiimiit partiinut ingerlanneqarluni taanna aamma akuerineqarsinnaanngilaq.

Juulut Jeremiassenip oqarnera naapertorlugu politikerit aaqqiinngikkunik innuttaasut kamaqarnerat inoqatinut attaveqaatikkut anneruleriartuinnassaaq.

- Inuiaqatigiit tusaaneqarnerusariaqaraluarput massakkut annertoorujussuarmik SoMe-kkut inuppassuit kamaqaleraluttuinnarput neriorsorneqarnerlunnerup kinguneranik.

Amerlassusaat

Aaqqissuisup akerliussutsimik takutitsinissamut qanoq amerlatigisut takkutissanersut kisitsilerlugu oqaatigisinnaanngilaa.

Taamaakkaluartorlu Juulut Jeremiassenip Ilulissani, Aasianni, Qaqortumilu innuttaasut akerliussutsimik takutitserusuttut aamma attaveqarfigisimavai.

- Kisianni politiinut nalunaaruteqarnissaminnut nalornisut immaqaluunniit tunuarsimaartut. Aaqqissuisinnaasut amigaataagunaramik.