Utoqqalinersiat pillugit aaqqissuusseqqinnermi innuttaasut aalajangeeqataanissaat pingaaruteqartoq

Utoqqalinersiaqartitsinermi aaqqissuusseqqinnissami innersuussutissat utoqqalinersiat pillugit immikkut ilisimasalinnit maanna suliarineqaleruttorput.

Innuttaasunillu peqataatitsisoqarnissaa suliami immikkut ilisimasallit siulittaasuata, Maliina Abelsenip pingaaruteqarnerarpaa:

- Utoqqalinersiaqalernissamut nammineerluni katersititsisoqartalernera isornartorsiorneqarsimaqaaq. Taamaammat innuttaasut tamaasa tusaaniarnissaat pingaaruteqarpoq. Utoqqalinersiaqartitsinermut aaqqissuussineq sakkortulaarsinnaasoq qanoq paasineraat, sunaanersoq? tamannalu qanoq attanneqarsinnaanersoq, taanna oqarpoq.

Suliamut tunngatillugu innuttaasut 4000-it nalaatsortumik toqqagaasut immersuiffissamik e-boksikkut nassiussuiffigineqaqqammerput.

Immersugassarlu immersoraanni siunissami imminut iluaqutaasussamik aamma iliuuseqarnerusoq taassuma ilanngullugu oqaatigaa.

- Innuttaasut kissaataat suunersut, utoqqalinersiaqartitseriaaserlu qanoq isigineraat pillugu immersugassamik nassiussinissarput pisariaqartissimavarput.

- Nammineerlunilu utoqqalinersianut suut nalorninarnerpaanersut aamma paasineqarnissaannut tunngassuteqartut, Maliina Abelsen oqarpoq.

Isumaliutissiissutip marsimi tunniunneqarnissaa naatsorsuutigineqartoq

Siunissami utoqqalinersiaqarnerup aaqqissuuneqarneranik innuttaasut ilusilersueqataanissaat misilittagaasalu misissuinermi ilanngunneqarnissaat aamma matumani siunertarineqarpoq.

Nammineerluni utoqqalinersiaqalernissamut katersisussaatitaanerup aallartinneraniit innuttaasut ilaat eqqugaanerlummata attanneqarsinnaasumik aaqqissuussisoqarnissaa aamma pingaartinneqarpoq.

- Inuit namminneerlutik utoqqalinissaminnut katerseqataasalernissaat qularutissaanngilaq. Tassanilu naapertuilluartuunissaa pingaaruteqarluinnarpoq. Kinguaariit tullinnguuttussat aamma isiginiarneqartariaqarput, utoqqaliartortugummi amerliartuinnarpugut, sulisinnaasullu ikiligaluttuinnarlutik.

Immersugassamik nassinneqartut isummaminnik oqaasertaliinissaminnut periarfissinneqarneri qulakkeerniarlugit SMS-ikkut oqarasuaatikkullu attaveqarluni malitseqartitsisoqassaaq.

Suliallu maanna inaarsarneqaleruttorput.

- Misissuinerit piareerpata, innuttaasut akissutaat takkuppata isumaliutissiissummik taasakkatsinnut innersuusiarissavagut, taakkualu Naalakkersuisunut tunniutissavagut, Maliina Abelsen oqarpoq.

Utoqqalinersiat pillugit immikkut ilisimasallit isumaliutissiissutaat ukiup tulliani marsip qaammataani Naalakkersuisunut tunniunneqarnissaa pilersaarutigineqarpoq.