VIDEO Illuatungiliuttut Naalakkersuisooqatigiit ajugaaffigaat
![](/sites/default/files/styles/image_934x467/public/oembed_thumbnails/2022-12/CByCQ8wB3kEoKM3B1s0lTQP-ApXJj31V7XacjYqHCkk.jpg?itok=-7IhJPQY)
Illuatungeriit unamminermi sumut sammiveqarlutik aallartissanersut, dommerimit Allan Eriksenimit isumaqatiginninniutigineqareermat illuatungiliuttut eqitaarlutik piukkoorput, Naalakkersuisooqatigiillu unamminissap aallartinissaanut piareerluinnaqqasut, unammineq aallartiinnaqaaq.
Arsaalluni unammineq Naalakkersuinikkut unamminerunngikkaluartoq, malunnarpoq unamminerup aallartinneraniit politikerit tamarmik ajugaarusussuseqarlutik tamaviaartut.
Unamminerup immikkoortuani siullermi akersuunnerit sakkortusinnaasutut isikkoqaraluartut iligiit tamarmik isertitaqanngitsoorlutik illaagutinnapput, taamaattumillu muminnermi Naalakkersuisooqatigiinni qanoq arsariaaseqanissaq pillugu eqqartuingaatsiartoqarpoq, illuatungiliuttulli ukiut siuliini arsaalluni unammiuaarnerni ajorsartauartarsimasut muminneq qasuersaarfiginerusutut atorpaat.
![](/sites/default/files/styles/image_934x467/public/article_images/20151010_152220.jpg?itok=XnJtI-eD)
Unamminerup immikkoortuata aappaa aallartimmat unammisuni ajugaarusussuseqarneq malunnarsillualaavippoq, Aningaasaqarnermut Naalakkersuisoq illuatungiliuttunit aqqunatallanneqaraluarpoq, aningaasaqarnermulli Naalakkersuisoq aqqunavissimannginnami unammeqataanini ilungersungaarluni nangiinnarpaa.
Unamminermi illuatungeriit naligiilluaqaat, målmandiusullu Naalakkersuisooqatigiinni Justus Hansen illuatungiliuttunilu Agathe Fontain annaassisaqattaavissorput, apeqqutaaginnaleqqallunilu arlaat kikkut isertitseqqaartuussanersut.
Illuatungiliuttunit Múte Bourup Egedep ungasianit sakkortuumik iserteriagaa Naalakkersuisooqatigiit måliniittuata Justus Hansenip akornerliugaa, illuatungiliuttuni arsaqataasup Sikkip mumereernerup qiteqqutilernerani torrallavillugu isertippaa.
![](/sites/default/files/styles/image_934x467/public/article_images/20151010_152037.jpg?itok=SU2smJ64)
Naalakkersuisooqatigiit isertitserusullutik tamaviaaraluaqaat, illuatungiliuttulli måliniittuat Agathe Fontain isertitsivigineq sapivippaat, unamminerlu naammassimmat illuatungiliuttut ataaseraarlutik ajugaapput, Naalakkersuisooqatigiit illaagutinnattut.