Illuatungiliuttut Lars-Emil siulittaasorerusunngilaat

Qinigaaffiup siuliani pissusilersuutai akuerineqarsinnaanngimmata, IA-mit oqaatigigineqarpoq.

Inatsisartunut tamakkiisumik sullissisumik Partii Naleqqakkut Inatsisartut Siulittaasoqarusupput.

Inatsisartunut Naalakkersuisunullu ilaasortat ullueqqata missaani Inatsisartuni inissiterinermi tamarmik akuerisaammata Naalakkersuisooqatigiilersut Siumut, Demokraatit Atassutikkullu maanna pisortatigoortumik ivertinneqarput.

Ataatsimiinnerillu pilersaarutaasut malillugit ingerlapput. Lars-Emil Johansen Inatsisartut Siulittaasuattut qinigaaqqippoq aammattaaq inatsisartunut ilaasortanngortut tamarmik akuerisaallutik.

Inuit Ataqatigiit Partii Nalerarlu illuatungiliuttuunertik malunnartillugu Lars Emil Johansen inatsisartut siulittaasuattut innersuutinngilaat nikaginnilluni immikkoortitsisarnera pillugu:

- Tassa taamaaliorpugut qinigaaffiup siuliani, ilaatigut naammaginarpallaanngitsumik oqariartuuteqartarnera pillugu. Aammalu ataatsimoortitsiniarnerusumik qalipaasersuinnginnerusumik taavalu inatsisartut qajalukkanik allanillu taajorlugit siuttoqarnikkut ingerlaneq tutsuiginarsorinnginnatsigu.

- Taamatut oqaaseqartarnermini inatsisartut taakku pineqartut akisinnaasanngillat taavalu aamma innuttaasut inatsisartunut tatiginninnerannut iluaqutaanani, Aqqaluaq B.Egede Inuit Ataqatigiinneersoq taama oqarpoq.

Hans Enoksen Partii Naleqqap siulittaasua isumaqataavoq:

- Taaseqatigiinnissamik isumaqatigiissuteqarpugut taannalu tunngavigalugu isumaqatigiissut ataqqillugu Inuit Ataqatigiit qinigassanngortitaat toqqarparput.

Illuatungiliuttulli siulittaasutut innersuussaat Agathe Fontain Inatsisartut siulittaasuatut qinigaasumit allaaneruvoq:

- Inatsisartut siulittaasoqarusuppugut inatsisartut aallartitaatut pissuseqartumik taavalu aamma inatsisartuni sulinermi ataqqinassutsimik kivitseqataasinnaasumik, Aqqaluaq B. Egede oqarpoq.

- Lars-Emiili qularinngivippara suleqatigilluarsinnaagipput. Illuatungiliuttuugaluarluta Inatsisartut siulittaasuat tamakkiisumik sullisisussaavoq. Agathe Fontainillu toqqarneqarnera atsioqatigiinnerput ataqqillugu uagut aamma taamatut toqqaavugut, Hans Enoksen oqarpoq.

Naalakkersuisut siulittaasussaat naalakkersuisunilu ilaasortassat akuerisaasut taaneqalermata illuatungiliuttunngortut taaseqataanngillat.

- Taamatut taasinnginnitsinni pissutaaginnarpoq isumaqatigiinniarnerni peqataatinneqarnitsinni ilisimatinneqaratalu anisiinnarneqarnerput pissuserissaarnerunngilaq.

- Uagut oqaloqatigigatsigit oqarpugut pissuserissaarlutalu ataqqinnillutalu partii anginerup oqaloqatiginnikkumanera ingerlatissavarput partiinut allanut pilersaaruteqarnata oqaloqatiginninnissamik, taamaakkaluartoq anisiinnarneqarnerput tupinnartorujussuuvoq, Hans Enoksen Partii Naleqqami Siulittaasoq oqarpoq.

- Naalakkersuisut siuttussaatut immineq pulaguni isumalimmik ingerlatsisoqarnera tutsuiginartutut isiginngilarput, taamaammat taaseqataanngilagut, Aqqaluaq Biilmann Egede IA-meersoq oqarpoq. 

Aqagu arfininngorneq sapaallu ilanngullugu Inatsisartut nutaat inatsisartutut pikkorissartinneqassapput, ataasinngorpallu immikkut ittumik ataatsimiinnermi ataatsimiitsitalianut ilaasortassat inissititerneqassapput.