Illuatungiliuttut aningaasanut inatsisissaq pikkunaagaat

Aappaagu aningaasanut inatsisissatut siunnersuut Naalakkersuisunit ippassaani saqqummiunneqartoq, illuatungiliuttunit pikkusuutigineqanngilaq. - Aappaagumut aningaasanut inatsisissatut siunnersuut qiviaraanni aaqqiissutissanik takusassaqanngilaq, Inatsisartut Aningaasaqarnermut ataatsimiititaliaani Siumut sinnerlugu ilaasortaq Finn Karlsen oqarpoq.
aggustip 17-at 2012 11:42

1 procentimik akileraarutip apparneqarnera sulerusutsitsilernavianngilaq aamma sulineq imminut akilersinnaasunngortinnavianngilaa. 10 million koruunit ikippallaaqaat suliffissaqartistiniarmut akiuinissamut, Finn Karlsen isumaqarpoq.

- Naatsumik oqaatigalugu ukiut siuliinut sanilliullugu pitsanngoriaatinik takusassaqanngilaq, Inatsisartut aningaasaqarnermut ataatsimiititaliaani Siumut sinnerlugu ilaasortaq, Finn Karlsen taama naliliivoq.

Aningaasaqarnermut Naalakkersuisup, Maliina Abelsenip Aningaasanut inatsisissatut siunnersuut ippassaani saqqummiukkamiuk, qangali siunnersuutaasimasoq, akileraarutip 1 procentimik appartinneqarnissa kiisami piviusunngortinneqartussaasoq nuannaarutigalugu avammut saqqummiuppaa.

1 procentimilli appaaneq sulinermik akilersitsisinnaalersitsinavianngitsoq, Siumumit Finn Karlsen isumaqarpoq.

- Procentimik ataatsimik akileraarummut appaasoqarpat, SIK tunngavigalugu akissarsiallit taamaallaat qaammammut 40 kroni sipaarutigisinnaavaat, taamaattumik sulinermut akilersinnaalerneranut tamanna tunngavigineqarsinnaanngilaq, Finn Karlsen oqarpoq.

Suliffissaaleqinerup akiorniarneqarnissaa pingaartillugu Naalakkersuisunit suliniutigineqartussatut saqqummiunneqarpoq, tamatumunngalu 10 million koruunit aappaagumut aningaasanut inatsisissamut illuartinneqarlutik.

- Suliffissaaleqinerup akiorniarneqarnera pingaartinneqartoq oqaatigineqarpoq, kisianni aningaasaliissutigineqartussat 10 million koruuniinnaapput. Ukioq manna tamassumunnga atorneqarput 37 million koruunit. Kinguariaat annertuvoq, Finn Karlsen oqarpoq.

Aningaasanulli inatsisissatut siunnersuut ilaqarpoq Siumumit isumaqatigineqartumik.

- Ullumikkut ajornartorsiutit annerpaartariavaat kollegiani inissaaleqineq, tamassuma aaqqiiviginiarnera pingaartinneqarmat nuannaarutigaarput, Finn Karlsen oqarpoq.

Inatsisartuni illuatungiliuttut partiit aappaat, Atassut Inatsisartunilu marlunnik ilaasortaatitaqartoq, Aningaasanut inatsisissatut siunnersuut iluarisimaarneruvaat. Taamaakkaluartorli pissutsit arlallit Atassummit uparuarneqarput.

Taakku ilaatigut oqaatigaat, pilersaarutit annertuut, Nunatsinnut aningaasanik isaatitsissutaasinnaasut, Naalakkersuisunit siusinnerusukkut aallartinneqartariaqartut.

Atassutip Aningaasaqarnermut ataatsimiititaliamut ilaasortaatitaata, Siverth K. Heilmannip aamma oqaatigaa, suliffissaqartitsiniarnermut aningaasaliissutissatut siunnersuutaasut ikippallaartut.

- Suliffissanik nutaanik pilersitsinissaq nukiginnarneruvoq, tamannalu aatsitassarsiornermiippoq. Alcoamullu tunngatillugu, tamassumalu ukiamut tunngaviusumik isummertoqarnissaa pissanganartut ilagisussaavaat, Inatsisartut Aningaasanut ataatsimiititaliaani Atassut sinnerlugu ilaasortaq, Siverth K. Heilmann taama oqarpoq.