Illuatungiliuttut aningaasanut inatsisissamut akerliuniarput

Aappaagumut missingersuutini pingaarutilinnut tunngatillugu illuatungiliuttut akerliunertik aalajangiusimaannarpaat aamma aningaasaqarnermut naalakkersuisup Maliina Abelsenip isumaliutissiissutaata kingulliup aningaasaqarnermut ataatsimiititaliamit oqaluuserineqarnerata kingorna, Atassutip Siumullu aningaasanut inatsisissamut akerliullutik taasinissartik ilimasaarutigaat.

Tassami piffissaq kingulleq tikillugu illuatungiliuttut aatsitassarsiornissamut ujaasinernut atatillugu akitsuusiisoqarnissaa aalajangiusimammassuk.

Sapaatip akunnerata naanerani aatsitassarsiornermut naalakkersuisumik Ove Karl Berthelsenimik isumasioqateqareernikkut naalakkersuisoqatigiit aningaasaqarnermut ataatsimiititaliami ilaasortaatitaasa amerlanerit siunnersuut itigartippaat, tassami Naalakkersuisut aningaasaqarnermullu ataatsimiititaliami ilaasortat amerlanerussuteqartut isumaqarmata, taama siunnersuuteqarnikkut nunani allamiut aatsitassarsiortitseqatigiiffiinit 332 millionit koruuninik isertitsiniarnissaq isumaliutigilluagaanngitsoq piviusorsiortuunanilu.

Tamatumunnga taarsiullugu naalakkersuisoqatigiit aningaasaqarnermut naalakkersuisup Maliina Abelsenip aningaasanut inatsisissatut amigartoorfiunanilu sinneqartoorfiunngitsumik siunnersuutaa tapersersorpaat. Matumani isaatitsiffiginiarneqartut tassaallutik imigassat imeruersaatillu tikisinneqartartut puuinik akitsuusiinikkut aamma aningaasartuutinik ileqqaarnikkut, raajanik akitsuutinik qaffaanikkut aningaasartuutinillu allanngortiterinikkut.