Illoqarfinni annerni biilinik misissuisoqaqqittalissasoq
- Biilinik nakkutilliinngitsoorneq ukiunik 25-nngortorsiussanngilaq.
Ineqarnermut attaveqaasersuutinullu naalakkersuisoq, Erik Jensen (S), taama oqarpoq.
Tassa illoqarfinni annerni biilillit biilimik qanittukkut misissorneqarnissaat naatsorsuutigissavaat.
Danmarkip angallannermut ministeria Thomas Danielsen Sisimiuni apriilimi ataatsimeeqatigereerlugu, naalakkersuisoq Erik Jensen taama oqarpoq.
Biilinik misissuisoqarnissaanik nunatta kissaatini Naalagaaffeqatigiinnermi Oqartussaasunut nassiutissagai, politikerit marluk taakku isumaqatigiipput. Tassanngaanniit Naalagaaffeqatigiinnermi Oqartussaasut misissuinerup isumagineqarnissaa sulissutigissavaat.
- Nassiussassagut nassiutereerpagut, piaartumillu aaqqiissuteqartoqarnissaa maanna utaqqillutigu, naalakkersuisoq oqarpoq.
Ineqarnermut Attaveqaasersuutinullu Naalakkersuisoqarfik naapertorlugu nunatsinni biilinik nakkutilliinermi makku ilaatigut kissaataapput:
- Biilinik piginnittut ataasiakkaat nakkutilliinermut aningaasartuutissaat Danmarkimi biiliutillit nakkutilliinermut akiliutigisartagaannit annertuneruallaassanngillat.
- Biilinik nakkutilliinernik illoqarfiit 750-it sinnerlugit biilillit, tassa Ilulissat, Sisimiut aamma Nuuk aallaqqaasiullugit ingerlatsiffiussapput.
- Ajoqutinut annernik biilinik nakkutilliisoqassaaq.
Nunatsinni biilinik kingullermik 1999-imi nakkutilliisoqarpoq. Danmarkimi biilinik nakkutilliisartuineersut sisamat nunatsinni biilinik nakkutilliiartorlutik taamani angalapput.
Biilinik nakkutilliineq angallannermut tunngasuniippoq, susassaqarfimmullu akisussaaffik tamanna nunatsinnit tiguneqarnikuunngilaq. Ineqarnermut Attaveqaasersuutinullu Naalakkersuisoqarfiup Naalagaaffimmi Oqartussat ilisimasariaqartunik avitseqatigissavaat nakkutilliinerillu qanoq ingerlanneqarnissaanik siunnersuuteqarfigissallugit.
