Aaja Chemnitz: Nunatsinni biilinik misissuisoqaqqittalernissaa assut qujanarpoq
Nunatsinni biilinik ukiuni kingullerni 23-ni misissuisoqanngilaq.
Nunatsinni biilinik kingullermik 1999-imi misissuisoqarpoq. Danmarkimi biilinik misissuisartuneersut sisamat nunatsinni biilinik misissuisartorlutik taamani angalapput.
Allanngortitsisoqalerporli. Nunatsinnimi biilinik misissuisoqaqqittalissasoq, ineqarnermut attaveqaasersuutinullu naalakkersuisoq Erik Jensen (Siumut) danskillu angallannermut ministeriat Trine Bramsen (S) isumaqatigiipput.
Biilit isumannaatsuunissaat anguniarlugu biilinik misissuisoqartarpoq. Soorlu biilit aquutaat, unittaataat, assakaasui, qullii, kalerrisaarutaat, akisuttartui atortuisalu ilaat soorlu ajorinngujuitsui apornermillu sakkukillisitsisartui aaqqissortariaqarnersut paasiniarlugu misissorneqartarput.
Biilit pujoorfii aamma misissorneqartarput.
Biilinik misissuinermi qanoq aaqqitassaqartiginersoq misissuinermut akigitassaq aalajangerneqartarpoq. Biilimillu piginnittoq akiliisussaavoq.
Danmarkimi biilinik misissuinermut piffissaliussaq nallertinnagu biilinik misissuisitsimanngitsut 2.000 koruuninik akiliisinneqartarput.
Taakku sapaatit akunnerata siuliani sisamanngornermi isumaqatigiipput.
- Nunatsinni biilinik kingullermik 1999-imi misissuisoqarpoq. Tamanna eqqartorparput, angallannermullu tunngatillugu siunissami qaninnerusumi suliniuteqartoqarnissaa naammagisimaartorujussuuara, naalakkersuisoq Erik Jensen oqarpoq.
Biilinik misissuineq nunatta suliassaqarfittut akisussaaffiginngimmagu danskit naalagaaffiat tamatumunnga inatsisinik suli aalajangersaasuuvoq.
Danmarkimi biilit misissorneqarnissaat piffissanngungajaleraangat e-boksikkut allagarsisarput, nunatsinnili taamaaliornissamut malittarisassaqanngilaq.
Angallannermut ministeri biilinik naafferartumik misissuinermut aalajangersagaliorsinnaasoq, danskit naalagaaffiata nunatsinni angallannermut inatsisaani 2008-imeersumi allaqqavoq. Qanorli periuseqartoqassanersoq kikkullu misissuisassanersut suli aalajangerneqanngilaq.
Atorfilittat nunatsinneersut Danmarkimeersullu angallannermi isumannaallisaaneq pillugu qaammatip matuma ingerlanerani ataatsimiissapput. Nunatsinni biilinik misissuisalernissaq misissueriaaserlu suna nunatsinni naleqqunnerussanersoq eqqartussagaat, Naalakkersuisut tusagassiutinut nalunaarput.
- Kalaallit Nunaannit suleqatima kissaataanut aaqqiissutissarsiornissarput uannut pingaaruteqarpoq, Trine Bramsen oqarpoq.
Nunatsinni biilinik ukiorpassuarni misissuisoqanngitsoq
Nunatsinni biilinik misissuisoqaqqittalertussanngornera qujanarluinnartoq, Folketingimi ilaasortaq Inuit Ataqatigiinneersoq Aaja Chemnitz Driefer oqarpoq.
- Inuimmi biilillu isumannaatsuunissaat pingaaruteqarpoq. Taamaammat tusarluarnaqaaq.
Nunatsinni biilinik misissuisoqartalertariaqanngitsoq taamaaliortoqartalissappallu asuli akissaajaataannaasasoq taassuma arlalinnit tusartarsimagaluarlugu, taama oqarpoq nangipporli:
- Nunatsinni illoqarfiit anginerit arlallit maanna biilerpassuaqarfiupput. Taamaammallu nunatsinni biilit isumannaatsuunissaat pingaaruteqarpoq.
Tamannali pillugu aatsaat malittarisassaliulersaartoqanngilaq. Danmarkimimi nunatsinnilu politikkikkut ukiorpassuarni oqallisaavoq, sulili piviusunngortinneqarani.
Henrik Dam Kristensenip Socialdemokratineersup Danmarkimi taamanikkut angallannermut ministeriusup Naalakkersuisut kissaataat naapertorlugu nunatsinni atuuttussamik angallannermut inatsisiliornissaq 2011-mi ilimasaarutigaa. Danmarkili nunarpullu misissueriaaseq suna nunatsinni naleqqunnerussanersoq isumaqatigiissutigisinnaasimanngimmassuk, danskit naalagaaffiat tamanna pillugu inatsisissamik Inatsisartunut siunnersuuteqanngilaq.
AAMMA ATUARUK Biilit misissorneqartarnerannut nutaamik systemitaarnissaq isumaliutigigaat
Namminersorlutik Oqartussalli nunatsinni biililerisunik oqaloqateqareerunik naalagaaffimmut Namminersorlutik Oqartussanulluunniit aningaasartuutaasussaanngitsumik atuisullu nammineq akiliisartussanngortillugit nunatsinni biilinik misissueriaasissamik siunnersuuteqassasut aalajangerneqarpoq.
Aammali taamaaliortoqanngilaq. Tamannami iliuuseqarfigineqassasoq danskit angallannermut taamanikkut ministeriata Venstremeersup Hans Christian Schmidtip neriorsuutigimmagu, aamma taamaaliortoqarsimanngitsoq 2015-imi paasineqarpoq.
Danskit angallannermut taamanikkut ministeriat Liberal Alliancemeersoq, Ole Birk Olesen, asserluinnaanik 2018-imi aamma neriorsuivoq. Namminersorlutik Oqartussat nunatsinnik biilinik misissuinermut naleqquttumik najoqqutassiortoqareeriarpat danskit naalagaaffiat tamatumunnga malittarisassioqataassasoq, taanna nalunaarpoq.
Politikkikkut nipangiutiinnarneqartarsimasoq
Nunatsinnili biilinik misissuinermut najoqqutassiortussat tamanna nipangiutiinnarsimagaat, Aaja Chemnitz Driefer isumaqarpoq.
Tamannali politikerinut suliassanngortinneqarmat, taanna isumallualerpoq.
- Allaffissornikkummi suliarineqarunnaarluni politikkerinut qinersisartuminnut sullissisuusunut suliassanngortinneqarpoq, taanna oqarpoq.
Nunatsinnili biilinik misissuisalernissaq Folketingimut qinersisitsinissamik nalunaartoqassappat tamanna kisimi unitsitsisuusinnaassasoq, taanna isumaqarpoq.
