Unnerluussisussaatitaasoq: Piumasaqaatitta tamakkiisumik taperserneqannginnerat uggornaraluarpoq
Tamanna pivoq Nunatta Eqqartuussisuuneqarfia unnerluussutini pisimasuni assigiinngitsuni pinngitsuutitsimmat.
Angutit arfiniliit unnerluussummi pisimasut pingajuanni, tassa hashimik anngiortumik aaqqissuussaamik 27,1 kilomit oqinnerunngitsumik eqqussisimasutut, pisuutinneqarput.
Arnaq hashimik 7 kilomik eqqusseqataasimasutut eqqartuunneqarpoq.
AAMMA ATUARUK Unnerluussanut tamanut pineqaatissiissutit annikinnerusut
Angutit arfinillit unnerluussummi Sermersuup Eqqartuussiviani pisimasuni siullermi aappaannilu, tassa hashimik anngiortumik 60 kilumik eqqussisimasutut pisuutinneqaraluartut, Nunatta eqqartuussisuuneqarfiani 30 kilomit oqinnerunngitsumik eqqussisimasutut pinngitsuutinneqarput.
Illersuisoq: Ingerlariaaseq taamaappoq
Suliassanngortitseqqiinermi pinneqaatissinneqarsimasut tamarmik annikinnerusumik pineqaatissinneqarput. Tamannalu unnerluussisussaatitaasup Robert Rafnip uggoralugu oqaatigaa.
- Piumasaqaatitta tamakkiisumik taperserneqannginnerat uggornaraluarpoq. Isumaqarpugummi suliarput pissusissamisoortoq. Massakkut taava Eqqartuussisuuneqarfiup aalajangiussai misissussavagut. Kisianni tunngavigisat iluameersoraakka. Ingerlariaasermi taamaappoq, Robert Rafn oqarpoq.
Illersuisoq naammagisimaarinnittoq
Naak Timmy Owen Zeeb kisiartaalluni suli tigummigallarneqaraluartoq illersuisuata Karina Skovip suliap inernera naammagisimaarpaa.
- Tigummigallarneqarnera akerlileraluarparput. Sivisunerpaamilli pineqaatissinneqarnikuummat Eqqartuussisuuneqarfiup aalajangigaa akuersaarparput, Karina Skov oqarpoq.
- Tamakkiisoq isigalugu inernera naammagisimaarpara. Tassami ukiunik tallimanik qaammatinillu arfinilinnik pineqaatissinneqarani, ukiunik sisamanik pineqaatissinneqarmat. Pisimasunilu arlalinni pinngitsuutinneqarluni. Eqqartuussisoqarfik Sermersuumit pisuutitaaneri sakkortuut arlallit aamma eqqarsaatigaanni inernera naammagisimaarpara, Timmy Owen Zeebip illersuisua Karina Skov oqarpoq.
Timmy Owen Zeeb hashimik eqqussisimasutut, nakuusersimasutut qunusaarisimatullu Eqqartuusisoqarfik Sermersuumi sakkortunerpaamik pineqaatissinneqarpoq, ukiuni tallimani qaammatinilu arfineq pingasuni pineqaatissinneqarsimasunut inissiissarfimmiittussanngorlugu. Nunatta Eqqartuussisuuneqarfiani inissiisarfimmiinnissaa ukiunut sisamanut sivikillineqarpoq aningaasallu 2 milliuunit koruunit arsaarinnissutigineqarlutik.
Nunatta Eqqartuussisuuneqarfiata suliassanngortitseqqiinermi Timmy Owen Zeebip siuttutut inissisimasimanera isinigiarpaa.
Pineqaatissiinerit sakkukinnerusut
Eqqartuussat sinneri pisuutinneqarput, pineqaatissinneqarnerili sakkukillineqarlutik.
Ilannguaq Nilesen aamma Minik Johnsen siullermik ukiunik tallimanik pineqatissinneqarput, ullumili ukiunik pingasunngortinneqartumik.
Ilannguaq Kristiansen, Aputsiaq Tröndheim aamma Fabian Pedersen tamarmik siullermik ukiunik tallimanik aningaasanillu annertuunik arsaarneqarlutik pineqaatissinneqarput, ullumili eqqartuussisuuneqarfimmi ukiunik pingasunik qaammatinillu arfinilinnik pineqaatissinneqarput.
AAMMA ATUARUK Hashimik anngiortumik eqqussisutut sivisuumik pineqaatissinneqartut
Ilannguaq Kristiansenip Tele-Postimi sulisuunini atornerlussimagaa Nunatta Eqqartuussisuuneqarfiata isiginiarpaa.
Unnerluuneqartoq kingulleq tassaavoq Mette Thomassen, hashimik 30 kg-ngajammik anngiortumik eqqqussisimasutut siullermik ukiunik pingasunik pineqaatissinneqarsimasoq. Eqqartuussisuuneqarfimmi pineqaatissinneqarnera sivikillineqarpoq ukiut marlunngorlugu
