Hashi pillugu suliaq: Unnerluussanut tamanut pineqaatissiissutit annikinnerusut
Nunatsinni hashimik anngiortumik eqqussineq pillugu suliat annerpaartaasa ilaanni unnerluussat arfineq marluk tamarmik pisuutinneqaqqipput, Eqqartuusisoqarfik Sermersuumi eqqartuunneqarnermik Nunatta Eqqartuussisuuneqarfianut suliareqqitassanngortinneratigut.
Eqqartuussaasulli taakku arfineq marluk pineqaatissinneqarnerat sivikillineqarpoq.
Timmy Owen Zeeb hashimik eqqussisimasutut, nakuusersimasutut qunusaarisimatullu Eqqartuusisoqarfik Sermersuumi sakkortunerpaamik pineqaatissinneqarpoq, ukiuni tallimani qaammatinilu arfineq pingasuni pineqaatissinneqarsimasunut inissiissarfimmiittussanngorlugu. Nunatta Eqqartuussisuuneqarfiani inissiisarfimmiinnissaa ukiunut sisamanut sivikillineqarpoq aningaasallu 2 milliuunit koruunit arsaarinnissutigineqarlutik.
Ilannguaq Nilesen aamma Minik Johnsen siullermik ukiunik tallimanik pineqatissinneqarput, ullumili ukiunik pingasunngortinneqartumik.
Ilannguaq Kristiansen, Aputsiaq Tröndheim aamma Fabian Pedersen tamarmik siullermik ukiunik tallimanik aningaasanillu annertuunik arsaarneqarlutik pineqaatissinneqarput, ullumili eqqartuussisuuneqarfimmi ukiunik pingasunik qaammatinillu arfinilinnik pineqaatissinneqarput.
Unnerluuneqartoq kingulleq tassaavoq Mette Thomassen, hashimik 30 kg-ngajammik anngiortumik eqqqussisimasutut siullermik ukiunik pingasunik pineqaatissinneqarsimasoq. Eqqartuussisuuneqarfimmi pineqaatissinneqarnera sivikillineqarpoq ukiut marlunngorlugu.
Nunatsinni anngiortumik hashimik eqqussineq pillugu suliat annerpaat ilaanni unnerluunneqartut arfineq marluk Eqqartuussisoqarfimmi Sermersuumi siorna aggustimi sivisuumik inissiisarfimmiiniissaannik eqqartuuneqarput.
Angutit arfinillit hashimik 60 kilomit oqinnerunngitsumik aaqqissuussamik anngiortumik 2015-imit 2017-mut Danmarkimit nunatsinnut eqqussisimasutut eqqartuunneqarput. Unnerluutigineqartorlu kingulleq hashimik 30 kiilungajammik eqqusseqataasimasutut eqqartunneqarpoq.
LÆS OGSÅ Tiltalte idømt lange foranstaltninger for hashsmugling
Tamarmik eqqartuuneqarnertik suliareqqitassanngortipaat, taannalu tassa massakkut Eqqartuussisuuneqarfimmi nammassineqarpoq.
Tassani eqqartuussisoq unnerluussanut tamanut pineqaatissiissutinik annikilliliivoq.
Nuussinerit pasinapiluttut
Bagmandspolitiit unnerluussasut ilaannik paasiniaalernerannut Grønlandsbankimit nalunaarutiginninneq peqqutaavoq. Grønlandsbankip sullissamik ilaata aningaaserivik aqqutigalugu pinerlunnermit aningaasarsiat inatsisitigut ajunngitsuutinniarneri anguniarlugu ikisisimasutut pasivaa. Sullissaasup 90.000 koruunit aningaaserivimmi sullissamut højrisikokundemik (nalorninarsinnaasumut) taaneqartartumut nuussimavai.
Taanna sullissaasup, sapaatip akunnera allortarlugu 2000 koruuninik aningaasarsisartumit, malunnartumik annertoorsuarnik nuutitsisarneranut assersuutaavoq ataasiinnaq.
