Illersuiniaqatigiit Savalimmiuni takornariartitsinermik akornuseeratarsinnaasut
Illersuiniaqatigiimmi niisarnat toqungasut assinginik aaginnaasunik internettikkut siammarterisimapput tamannalu Savalimmiuni takornariaqarnermut akornusiisinnaavoq.
Sea Shepherdimeersut sisamat Savalimmiuni niisarnarniartoqarneranut atatillugu Savalimmiunit anisitaapput. Taakku qaammat kingulleq niisarnarniartoqarneranik akornusersuinermik kingorna Savalimmiuni niisarnarniaq pillugu inatsimmik unioqqutitsisimasutut pineqaatissinneqarput.
AAMMA ATUARUK Sea Shepherd Danmark: pisiniarfinnut pisiniaannarsinnaapput
Savalimmiormiut ukiumut agguaqatigiissillugu niisarnat 800-t missaat pisarisarpaat, Savalimmiullu eqqaanni imartani niisarnat 100.000-it missaanniimmata, Atlantikullu imartaani katillugit 800.000-it missaanniimmata nungutaanissamut ulorianartorsiortinneqanngillat.
Sea Shepherdilli niisarnarniartarnermut akerliussutsimik takutsillutik suliniuteqarnerat Savalimmiormiut takornariartitsinikkut aningaasarsiornerannik, aalisarnerup saniatigut inuussutissarsiutit pingaarnerit aappaannik, eqquisinnaavoq. Umiarsuit takornariartaatit Tysklandimeersut marluk Savalimmiunukarnissat arlallit maannamut taamaatereersimagaat, nutaarsiassaqartitsivik Ritzau taama allaaserisaqarpoq.
AAMMA ATUARUK Politikeri savalimmiormiu: Niisarnarniarneq "uumasunik atugarissaartitsinermut assersuutissaqqissuuvoq"
AAMMA ATUARUK Niisarnarniarnermut akerliusoqarpoq
Tórshavnimi takornariartitsinermi paasissutissiisarfimmi pisortap, Theresa Thuridardottir Kreutzmannip, Sea Shepherdip assinik videonillu aaginnaasunik internettikkut siammarterinera takornariartitsinermik inuussutissarsiummut Savalimmiuni amerlaqisunit inuussutissarsiutaasumut kingunerlutsitsisinnaanera aarleqqutigaa.
- Niisarnarniarnerup piujuaannartitsinissamik tunngaveqarluni ingerlanneqarnissaa qulakkeerniarlugu soorunami aqutsinermut piniarnermullu malittarisassaqartariaqarpugut. Tamatumunngali peqatigitillugu niisarnarniarneq Savalimmiuni kulturikkut kingornussatut pingaarutilittut inissisimanera ataqqineqartariaqarpoq, Theresa Thuridardottir Kreutzmann taama oqarpoq.
