Politikeri savalimmiormiu: Niisarnarniarneq "uumasunik atugarissaartitsinermut assersuutissaqqissuuvoq"
Niisarnat namminneerlutik sinerissamut qanillattortarput, kapineqarlutillu qiteraat kipineratigut toqunneqarnissaasa tungaanut imaani eqqissillutik uumasuunerat nassuiaatigaa.
Niisarnarniarneq uumasunik illersuiniaqatigiiffimmit Sea Shepherdimit ukiormanna kingumut sammineqartupilussuuvoq. Illersuiniaqatigiiffimmeersut ukiut arfinilissaat Savalimmiut nunataanni imartaannilu najuupput, illersuiniaqatigiiffimmeersut hunnorujulippassuit niisarnanik nakkutiginnillutik niisarnarnianillu akornusersuiniarsaralutik.
AAMMA ATUARUK Niisarnarniarnermut akerliusoqarpoq
Illersuiniaqatigiiffiup niisarnarniarneq unitseqqullugu Danmarkimi politikerit kimigiiserfiginiarsariligaluarpaat, Sjurdur Skaalelli Berlingskemi allaaserisamini niisarnarniarneq Danmarkimi puulukit neqaannik tunisassiornermut naleqqiullugu "naalliutsitsinnginnerusutut" taavaa:
- Puulukit, kukkukuut, nersussuit minkillu toqunneqaraangamik aamma aalaqqaartarput. Pilanneqartarlutillu aamma. Aavallu aamma kuuttarluni. Tamannali toqqortumik, inunnut ersinngitsumi, pisarpoq. Aammalu piaraanermiilli mattussaaqqajuaannartarput – tamannali aamma takuneqarneq ajorpoq. Taamaammat uumasut taakku toqunneqaraangata ”nerisassanik” imaluunniit ”amernik tunisassiornermik” taaneqartarput, niisarnamanerli, toqqorterani ersiinnartumi pisartoq, ”toqoraanersuarmik” taaneqartarluni.