Niisarnarniarnermut akerliusoqarpoq
Maannamut Sea Shepherdimi ilaasortat arfineq marluk politiinit tigusarineqareersut, Sermitsiaq.AG allappoq.
Ukiormanna niisarnarniarnermut akerliuneq aamma innuttaasunit nittartakkatigut ingerlatsivinni minnerunngitsumik Facebookimi ingerlanneqarput.
Tassanilu Paul Watson Facebookimi quppernermini Danmark assuarlerpaa, isumaqarami niisarnarniarnermut annertuumik pisuussuteqartoq, sorsuutit marluk niisarnarniartunut malinnaasuummata. Nutaarsiassaqartitsivik Berlingske taama allaaserisaqarpoq.
Taamaattumik Watsonip folketingimi ilaasortat tamaasa inassuteqarluni allaffigai sorsuutit malinninneranut unitsitseqqullugit.
Aamma atuaruk Savalimmiormiut niisarnarniartarnerat malinnaavigineqassaaq
Oqaaseqartartoq: Naliginnaasumik piniarneruvoq
Niisarnanik toqoraaneq sakkortusinnaagaluartoq tamanna naakkittaatsuunngilaq, uumasunillu illersuiniaqatigiit akerliunerat ingasattajaarineruvoq.
Konservativemiit uumasunut atugassarititaasunut tunngasunut, Kalaallit Nunaannut savalimmiunullu tunngasunut oqaaseqartartoq, Rasmus Jarlov taama qisuariarpoq.
Taassuma naqissuserpaa niisarnat nungutaanissamut ulorianartorsiortitaannginnerat.
- Naliginnaasumik uumasunik piniarneruvoq, ukiullu hunnorujukkaani arlalippassuarni piniagaasarsimallutik. Savalimmiuni kulturimut nerisaqarneranullu ilaapput, soorunami aamma taamatut ingerlaannassaaq, taanna oqarpoq.
Tamannali illersuiniaqatigiit akuersaanngilaat.
Paul Watsonip oqaatigaa maanna atortut sakkullu nutaaliat atorlugit niisarnarniartoqartartoq.
Aamma atuaruk Sea Sherperd Savalimmiuni
Watson: Kulturimut tunngatillugu kanngunartuliaavoq
- Kulturimut tunngatillugu kanngunartuliaavoq, siornatigut arferit pisariaqavissumik piniagaasarput. Maannalu nuannariinnarlugu toqorarneqartarlutik, Facebookimini taama allappoq.
Niisarnanik toqoraasarneq timersuutitut isigineqassanngilaq, inuit arferillu akornanni ataqatigiinneq tassaassaaq naliligassaq, Rasmus Jarlov akerliliilluni oqarpoq.
- Soorlu puulukit uumasuutigineqartut inuillu akornanni naligiillutik ataqatigiinngillat. Uumasut nerineqassappata toqunnissai inerteqqutaannilaq. Naakkittartumik iliuuseqaruni naammappoq, taamaattumik assuarisassaqanngilanga, Berlingskemut taama oqarpoq.
