Sea Sherperd Savalimmiuni
Illersuiniaqatigiiffiup umiarsuaa "Brigitte Bardot" Torshavnip avataanut ippassaq kisarpoq, Savalimmiuni politiinit nakkutigineqarlualerluni.
- Sea Shepherd siusinnerusukkut maaniittareersimavoq, nalunngilarpullu ingasattajaartigalutik Savalimmiuni, Imaq Akullersuarmi Qalasersuaq Kujallermilu qanoq iliuuseqarniartartut. Taamaammat nakkutigeqqissaarpagut, Savalimmiut politiivini chefpolitiinspektør, Peter Thaysen DR Nyheder-mut oqarpoq.
Sea Shepherd 2000-imi kingullermik Savalimmiuniippoq. Niisarnamanermut Sea Shepherdip akornusersuinnginnissaa pillugu politiit sakkutuunit imarsiortunit umiarsuarmillu alapernaarsuummit, Hvidbjørnenimit taamani nakkutigineqarluni.
Avatangiisinik illersuiniat Sea Shepherdimeersut savalimmiormiunit, piniariaasertik saassunneqarmat kamattunit politiit taamani aamma nakkutigineqarput.
Taamani aporaannissaagaluaq pinngitsoortinneqarpoq - Sea Shepherdip Savalimmiuniinnerani niisarnat takkutinngitsoormata.
Chefpolitiinspektørip Peter Thaysenip neriuutigaa maanna aporaattoqassanngitsoq, taassumali maluginiarsimavaa, Sea Shepherd-ikkormiut assiliiartortunik sisamanik ilaasoqartut, taamaattumillu taassuma annilaagassutigaa aporaattoqassasoq.
- Sakkutuunit imarsiortunit pisariaqalissappat ikioqqusinnaavugut, Peter Thaysen oqarpoq.
Savalimmiuni niisarnamaneq juulimi aggustimilu pisarpoq. Sea Shepherdillu nalunaarutigaa qaammatit marluk Savalimmiuniissallutik.
