Illersornissaqarfiup Air Greenlandilu qulimiguuleqarnermut isumaqatigiissutertik sivitsorusukkaa

Nunatsinni qulimiguulimmik annaassiniarnermut upalungaarsimaneq danskit illersuisoqarfiata suliariumannittussarsiuunnianngilaa. Air Greenland isumaqatigiissummik, ukiortaamut killeqaraluartumik, taamaalilluni sivitsuiniarsinnaanngorpoq.
Air Greenland qulimiguulinnik Airbus H225-nik marlunnik pisereerpoq. Taakku ingerlatseqatigiiffiup nunatsinni upalungaarsimanermut suliarinnittussarsiuussinermi toqqagaaaguni atorniarpai. Air Greenland illersornissamut ministereqarfillu suliariumannittussarsiuussinertaqanngitsumik maanna isumaqatigiinniartussanngorput.
maajip 13-at 2020 10:01
Nutserisoq Aili Liimakka Laue

Qulimiguullip upalungaarsimanermi atorneqarneqartartup EU-mi suliariumannittussarsiuunneqarnissaa Illersornissamut Ministeriaqarfiup taamaatimmagu, tamanna maannamut qularnanngitsortaalerpoq. 

Altinget taama allappoq.

Air Greenlandip illersornissamut ministereqarfillu maanna isumaqatigiissutaat qaammatit arfineq-marluk qaangiuppata qaangiuttussaagaluarpoq. Isumaqatigiissut taanna qulimiguulinnik marlunnik annaassiniarnermi atugassanik ulloq unnuarlu pinngitsoorani upalungaaqquteqarnissamik piumasaqaatitaqarpoq.

Isumqatigiissutip suliariumannittussarsiuuttussaajunnaarnera Air Greenlandip illersornissamut ministereqarfiup atortunut pisiortornermullu aqutsisoqarfialu toqqaannartumik isumaqatigiinniarsinnaangornerannik kinguneqarpoq.

AAMMA ATUARUK Qulimiguullit marluk SAR-imut atorneqarsinnaasut pisiarineqarput

Suliariumannittussarsiuussinngiinnalerneq isumannaallisaanermik peqquteqartoq

EU pillugu tunngaviusumik isumaqatigiissummi paragraffi immikkoortoq naapertorlugu nunap Danmarkitut ittup suliassiinerit atortunillu pisiortornerit EU-mi suliariumannittussarsiuutinngitsoortissinnaavai.

Suliassat nunap sillimaniarnikkut soqutigisai eqqqasaatigalugit suliarinnittussamut aalaajangersimasumut tunniunnissaat pisariaqartoq nunalluunniit killeqarfiisa iluanni naammassineqartariqartoq nunap nalileruniuk taamaaliorsinnaavoq. Isumannaallisaanermullu tunngasut matumani apeqqutaasut, illersornissamut ministeri isumaqarpoq.

- Nunap isumannaatsuunissaanut tunngassuteqarpoq, tamannalu suliap naammassinissaanut pingaaruteqarluinnarluni. Tamanna illersornissaqarfiup nunamik piginnittussaanermik takutitsinissaanut, Issittumilu pissutsit aalaakkaasuunissaannik isumannaatsuunissaannillu tunngassuteqartoq, illersornissamut ministeri Trine Bramsen (S) Altingetimut oqarpoq.

Taakkuli sumorpiaq tunnganersut, Trine Bramsenip ilisimatitsissutiginngilaa.

Air Greenland suliariumannittussarsiuussinermi inissisimalluarusulluni qulimiguulinnik marlunnik 2019-mi pisivoq.

Illersornissamut ministereqarfimmik sapinngisamik pitsaanerpaamik isumaqatigiissuteqarnissaq timmisartuutileqatigiiffimmut maanna pingaarnerpaavoq. Tamanna suliffeqarfimmut coronavirusip ajornartoortitsinerani suliffinnik 75-it 100-llu akornanni amerlatigisunik atorunnaarsitsisariaqalertumut iluaqutaasinnaasorujussuuvoq.