Air Greenland: Qulimiguullit marluk SAR-imut atorneqarsinnaasut pisiarineqarput

Qulimiguullit marluk ujaasinernut annaassiniarnernullu atorneqartussatut naatsorsuutigineqartut marluk Air Greenlandip maanna pisiarai, SAR pillugu isumaqatiginninniarnissap tullianut piareersarnini Air Greenlandip taamaasilluni takutippaa, SAR pillugu suliariumannittussarsiuussinissami isumaqatiginniarniassat tullii ukiup affaa tulliuttup ingerlanerani aallartissapput.

Qulimiguullit marluk pisiarineqartut tassaapput Airbus H225-t, atortunik nutaaliaalluinnartunik atortulersorneqarsimasut. Qulimiguullit pineqartut Issittumi pissutsinilu ajornakusoorsinnaasuni atorneqarluarsinnaapput. Air Greenland tusagassiutini nalunaarummi taama ilaatigut allaaserisaqarpoq.

SAR-ili pillugu isumaqatiginninniarnerit suliluunniit aallartinngitsut qulimiguulinnik taakkuninnga pisinissaq ernumanartoqannginnersoq, Air Greenlandip pisortaanera Jakob Nitter Sørensen aperaarput, akivorlu:

- Taama oqartoqarsinnaavoq, kisianni qulimiguulinnik pisinngikkaluarutta ernumanarnerusinnaasussatut nalilerpara, Air Greenlandip pisortaanera oqarpoq.

- SAR-imummi suliariumannittussarsiuussisoqalerpat qulimiguulinnik atorsinnaasassatsinnik peqanngikkutta akinut tamanna sunniuteqarsinnaavoq. Qulimiguulinnik nutaanik peqalernitsigut SAR-imi suliariumannittussarsiuussisoqarnissaanut inissisimalluartilersissavaatigut, Jakob Nitter Sørensen oqarpoq.

Qulimiguullit nutaat marluk qaqugu atorneqarsinnaalissanersut Air Greenlandip suli ilisimanngilaa, SAR-imilli suliariumannittussarsiuussinermi Air Greenland ajugaassappat 2020-p ingerlanerani atorneqalersinnaanissaat naatsorsuutigineqarpoq.

Qulimiguullit nutaat marluk pisiarineqarnerat maannamut atorneqartut S-61-it atorunnaarneqarnissaannik kinguneqassaaq.

S-61-it 1965-imi pisiarineqarput, Air Greenlandilu ujaasinernut annaassiniartarnernullu atatillugu qulimiguullit taamanikkulli atortalerlugit.