Naalakkersuisut: Illersornissaqarfik nunatsinni ulloqartinneqartaleqqissanngilaq

Nunatsinni sakkutuut imarsiortuisa umiarsuaanni sakkutuujunissamik takorluugaqaruit, taava tamanna piviusunngortinniarlugu massakkut siunissamilu Danmarkiliaqqaartariaqassaatit.

Illersornissammi ulloqartinneqartarnera, aamma sakkutuussarsiornermut misilitsiffiusartoq nunatsinni periarfissaaqqilissanngikkallarpoq.  

Nunanut allanut, inuussutissarsiornermut niuernermullu naalakkersuisoq Vivian Motzfledt (S) KNR-imut akissuteqarluni taama allappoq.  

- Inuusuttut sakkutuujusussaatitaanermut misilitsikkusunnerlutik misilitsikkusunnginnerlutilluunniit nammineq aalajangissagaat isumaqarpunga. Illersornissaqarfiup nunatsinni ulloqartinneqartaleqqinnissaa Naalakkersuisut kissaatiginngilaat.

IA: Illersornissaqarfik ulloqartinneqartaleqqilli

Kalaallit inuusuttut sakkutuunngorusuttutut misilitsinniarunik 2021-mili Danmarkiliaqqaartalerput. 

Kalaallit inuusuttut sakkutuunngorusuttut amerlanerulersinnarlugit Illersornissaqarfik nunatsinni sumiiffinni arlalinni ukiuni arlalinni ulloqartitsisarnikuuvoq. 

Kalaallilli inuusuttut amerlanerusut sakkutuunngorusullutik Illersornissaqarfimmut nalunaartalernissaat pisariaqartinneqarpoq. Illersornissaqarfimmi nunatsinni ulloqartinneqartinneqartaleqqissasoq naalakkersuisoqatigiinneersut IA illersornissaq pillugu siunnersuumminni isummerput. 

- Pingaartumik sakkutuut imarsiortuinut tunngatillugu tapersiinissaq pissusissamisoorluinnarpoq, taakkumi maani nunatsinnilu aaqqitassanik suliassarpassuaqarput, IA-p folketingimi ilaasortaatitaa Aaja Chemnitz oqarpoq.

Danmarkimi illersornissamut ministeriugallartoq Troels Lund Poulsen (Venstre) oqaaseqarpoq inuusuttunik sakkutuujusussaatitaasunik amerlanerulersitsinissamut sakkutuujusussaatitaanerullu sivitsorneqarnissaanut danskit nalakkersuisoqatigiivi piareersimasut.

Illersornissaqarfiup nunatsinni ukiuni marlunni, tassa 2018-mi 2019-imilu ulloqartinneqartarnerani, inuusuttut nunatsinneersut 37-t sakkutuujusussaatitaanermut akuerineqarsimasut illersornissamut ministeriusimasup Trine Bramsenip (Socialdemokratiet) KNR-imut paasissutissiissutiginikuuaa.

Sakkutuujunngitsunik upalungaarsimasoqarneq ukkanneqassasoq

Illersornissaqarfiup nunatsinni ulloqartinneqartarnerata unitsinneqarnissaanik aalajangertoqarmat Naleqqap siulittaasua Pele Broberg nunanut allanut naalakkersuisuuvoq.

Issittumi sakkutooqarnerup annertusarneqarnissaa kissaatigalugu taassuma arlaleriarluni oqaatiginikuuaa, ilaatigut sinerissami alapernaarsuisut ujaasinermik annaasiniarnermillu suliallit, imartat avatangiisaannik illersuineq aamma aalisarnermik nakkutilliineq pineqarlutik.  

Taakku nunatsinni suliassat Issittumi Sakkutooqarfiup Illersornissaqarfiup ataani suliarai.  

Illersornissaqarfiup nunatsinni ulloqartinneqartarunnaarnissaa 2021-mi aalajangerneqarmat Siumumi ilaasortat isornartorsiuigaluartut aalajangiussaq Vivian Motzfeldtip attatiinnarpaa. 

- Naalakkersuisut nunatsinni pisut ataatsimut isigalugit oqallinnissamut ammapput, ilaatigut periarfissaasinnaasut allat eqqarsaatigalugit. Soorlu pingaartumik sakkutuujunngitsut suliassaat sakkutuujunngitsunit suliarineqarnissaat eqqarsaatigineqarsinnaavoq, Vivian Motzfledt KNR-imut allappoq.  

Danmarkip nunattalu illersornissamut isumaqatigiissutaat 2022-meersoq naapertorlugu inuusuttunut 18-it 25-llu ukornanni ukiullinnut Kangerlussuarmi illersornissamut 2024-mi ilinniarfeqalissaaq.    

Kalaallit inuusuttut Danmarkimi Illersornissaqarfiup ulloqartinneqarneranut peqataajartorlutik angalasut aningaasatigut taperneqartassanngitsut Namminersorlutik Oqartussat 2021-mi nalunaaruteqarput. 

Naalakkersuisoq Vivian Motzfeldt (S) tassannga inatsimmik allanngortitsiniarnerluni KNR-imut akissutimini paasissutissiinngilaq.