Illersornissaqarfik: Mestersvigimi mittarfik aatsitassarsiornermi atorneqarsinnanngilaq
Pilersaarut pisariikkaluaqaaq:
Aatsitassarsiorfik aatsitassamik pinngoqqaammik molybdænimik ulikkaartoq aatsitassarsiorfimmilu sulisut untritillit arlallit, timmisartorlutik Mestersvigimi mittarfik atorlugu tikittartussat aallartartussallu.
Canadamiut ingerlatsiviannut Greenland Reources Inc.-imut tamanna aallaaviuvoq, tassami Malmbjerget-imi Illersornissaqarfiup stationiisa ilaata Station Mestervigimit 30 km missaannik ungasissuseqartumi aatsitassarsiorfeqalerniarami.
Pilersaarut ingerlatsiviup suliassanik allattorsimaffiani avatangiisinut sunniutit nalilineq (ASN)-mi Nalakkersuisut akuerisimassaanni atuarneqarsinnaavoq.
Kisianni pilersaarut Station Mestersvigimi pissutsit ullumikkutut itsillugit ajornavippoq.
Tunumi piiaaffimmik suliniut
Canadamiut selskabiata Greenland Resources Inc.-ip pinngoqqaat molybdæn aatsitassarsiorfimmi Mestervigimit sineriak atuarlugu kujammut kimmut 30 kilometerinik ungasitsigisumiittumi piiarusuppaa.
Molybdæn sisammik tunisassiornermi ilaatigut atorneqartarpoq.
Ukiuni 18-ini ulloq unnuarlu piiaasoqarnissaa piffissamilu molybdænimik kimittorsakkamik 22.000 tonsinik piiaasoqarnissaa pilersaarutaavoq.
Piiaaffimmi 300-nit 500-t tikillugit sulisoqarnissaa naatsorsuutigineqarpoq.
Kim Dalgaard Poulsen, oberstløjtnanti aamma Arktisk Kommandomi suliaqarnerni pisortaq, taama oqarpoq.
- Unammilligassaq annertooq tassaavoq mittarfik ammasuunngimmat, kisianni tassaalluni air strip-imik taasagaq – pisariaqartikkutsigu – allanit atorneqarsinnaajunnaarlugu ilisaajarsinnaasarput. Kiusianni ukiuunera tamaat atorneqarneq ajorpoq Station Mestersvigimi sulisoqarnitsinnik pissutsit pissutigalugit mittarfittut ammasutut ingerlassinnannginnatsigu, Kim Dalgaard Poulsen oqarpoq.
Ullumikkut Illersornissaqarfik stationimi marlunnik sulisoqaarpoq. Taakku suliassaraat aserfallatsaaliissallutik aamma ilaatigut Siriuspatruljen angalanerani tapersersussallugu.
Forsvarsministeriet (Illersornissaqarnermut Ministereqarfik) Naalakkersuisunut tusarniaammik akissuteqarnermini , allappoq "Station Mestersvigip sakkutuujunngitsunit aalajangersimasumik pisartumik timmisartutigut atorneqartarnissaa sulisut tungaasigut naammattunik periarfissaqanngitsoq."
Silaannakkut angallassikulanerni nunat assigiinngitsut akornanni piumasaqaatit
Kisianni Station Mestersvig-imi sulisoqarneq allanngortinneqarsinnaavoq, politikerit Illersornissaqarfillu isumaqatigiissinnaappata.
Kisianni mittarfiup atukulanerata timmisartortitsinermut nunat assigiinngitsut akornanni piumasaqaatinik arlalinnik kinguneqassaaq. Mittarfik atorneqakulanerugaangat isumannaallisaanermut piumasaqaatit amerlanerulersarput.
- Tassaasinnaapput mikkiartornermut atortorissaarutit, sila ajorpat isikkivilullunilu. Akulikitsunnguamik pisaassappat aamma qatserinermut upalungaarsimasoqassaaq, Kim Dalgaard Poulsen oqarpoq.
AAMMA ATUARUK Mestersvigip eqqaani aatsitassarsiulersaartut piiaavilioriaannaangajalerluinnartut
Malittarisassat taakku Illersornissaqarfiup eqqortissinnaalluarpai. Kisianni tamatumunnga piumasaqaataavoq amerlanerusunik sulisoqalernissaq mittarfimmik artorneqarnerusumik passussinissamut ilinniarsimasunik.
- Imaanngilaq Illersornissaqarfiup aatsitassarsiornermik ingerlatsineq tapersersorumanngikkaa. Illersornissaqarfik annertussuseqarpoq nammineq suliaqarnitsinnut tapersersuisussamik. Tassalu sulisut qanoq amerlatigisut sumiiffimmi aalajangersimasumi atussanerlugit naatsorsuinitsinni nammineq qanoq amerlatigisunik pisariaqartitsinerput aallaavigisarparput, Kim Dalgaard Poulsen KNR-imut oqarpoq.
Tikissinnaanermut pas-imik nakkutilliineq pisariaqartinneqarpoq
Akornutaasinnaasut pingajuat tassaavoq Kalaallit Nunaannut ilaasunik tikittunik Kalaallillu Nunaannit aallartussanillu nakkutilliineq.
Kalaallit Nunaat Danmark aqqutigalugu Schengen-imi siumaqatigiissummut ilaavoq, tamatumalu kinguneraa nunamut tikittunik aallartussanillu tamanik pas-iinik nakkutiulliineq.
Tamanna assersuutigalugu Tunup Avannaani Station Nord-imi pisarpoq, tassani Illersornissaqarfik politiit sinnerlugit angalasunik tamanik kinaassusiinik nakkutilliissarpoq. Tassa sakkutuut, ilisimatuussutsikkut misissuisut tikeraallu allat pineqarput.
- Mestersvigiliaassagaanni nunanit allanit tikittariaqarpoq, Kalaallit Nunaata sinneraniinngitsoq. Taamaattumik aamma isernissamut nakkutilliinermik piumasaqaateqarpoq, Arktisk Kommandomi suliaqarnermik tapersersuinermik immikkoortortami pisortaq oqarpoq.
AAMMA ATUARUK Station Nord godkendes som ny Schengen-grænse
ASN-imik suliassat allattorsimaffianni Greenland Resources Inc. allappoq, at " Mestersvig-imi mittarfiup atorneqarnissaa pillugu kalaallit namminersorlutik oqartussaat danskillu illersornissaqarfiat oqaloqatigineqassasut."
Greenland Resources Inc.-ip siulersuisuini siulitaaasoq Ruben Shiffmann KNR-imut nalunaarpoq ingerlatsivik silaannakkut angallassinissamit periarfissat allat piareersimatinniarlugit.
Station Mestersvig-ip saniatigut mittarfik qaninneq tassaavoq Nerlerit Inaat aatsitassaqarfimmiit kujammut kangimut 150 kilometerinik ungasissusilik. Kisianni mittarfik taanna 1000 meterinik takissuseqarpoq - Station Mestersvigimi mittarfimmit 800 meterinik naannerulluni.
Greenland Resources Inc. 2009-miilli Malmbjerget-ip eqqaani nunami ujaasilluni misissuinissamut 80 kvadratkilometerit missaannik annertutigisumut akuersissummik peqarpoq.
