Ilisimatuut: Sermersuup aakkiartornera malinnaaffigaarput
Ilisimatuut, Danmarkimi naalagaaffiup pinngortitaq pillugu katersugaasiviani atorfillit, Danmarks Tekniske Universitetimi avataarsualerisut peqatigalugit, sermersuup aakkiartornera misissuiffigaat.
Ilisimatuut misissuinerannit takusat aallaavigalugit paasissutissat nutaat katersorneqarput, maannammut sermersuup aakkiartorneranit paasisat qarasaasiat iluaqutigalugit katersorneqarsimagaluartut.
Ilisimatuut misissuinerannit inernerit takutippaat Sermersuup ilaa annertoorujussuaq ukiut hunnorujulikkaaat kingulliit ingerlaneranni annikinnerulersimasoq. Kujataata kangisinnerusortaani aamma avannaata kippasinnerusortaani sermip 53-imit 83 procentit tungaanut aassimavoq.
Sermersuup aakkiartorneranit toqqaannartumik takusat misissukkallu aallaavigalugit ilisimatuut siullermeersumik misissuipput, sermersuup piffissami sivisuumi aakkiartornera naliliiffigissagaangamikku.
Sermersuup piffissami sivisuumi aakkiartornera ilaatigut assitoqqanit assilisat aallaavigalugit ilisimatuunit nalilersuiffigineqarput.
Kalaallit Nunaat piffissami 1978-imit 1987-ip tungaanut timmisartumit assilineqaqattaarpoq, assilisani taakkunani nunap ilusaa aamma sermip allanngorarnera takuneqarsinnaalluarlutik.
Paasissutissat nutaat saqqummiunneqarnerisigut imavissuit ukiuni kingullerni hunnorujulikkaani qaffakkiartornerisa paasiniarneqarnerinut iluaqutaassapput, taamaattumik Nalagaaffiit Peqatigiit silap pissusaa pillugu oqallittarfiani ilaasortat silap pissusaa pillugu nutaanik nalunaarusiornissaannut pingaaruteqarlutik.
