Ilisimatusarfiup rektoria siulleq 93-inik ukioqarluni toquvoq

Kalaallit Nunaanni siullersaalluni professori Robert Petersen, 93-inik ukioqarluni sivikitsumik napparsimareerluni Odense Universitetshospitalimi toquvoq. Ilaqutaasa tamanna nalunaarutigaat. Sermitsiaq.AG taama allaaserisaqarpoq.

Robert Petersen Maniitsumi 1928-mi inunngorpoq, Kalaallit Nunaanni ilinniartitsisutut 1948-mi naammassilluni, Danmarkimilu ilinniartitsisutut 1953-imi naammassilluni.
Kingorna ilinniartitsisutut sulivoq, 1972-imilu lektorinngorluni, Københavnillu Universitetiani Eskimologimi 1975-imi professorinngorluni.

Ilisimatusarfimmi atorfininnginnermini Inuit Instituttimi pisortaavoq, Ilisimatusarfillu ammarmat siullerpaalluni rektoritut atorfeqalerluni, 1995-imilu soraarninngornissami tungaanut atorfigalugu.

Robert Petersenip jornguata Jakob Petersenip Robert Petersenip toqunera Sermitsiamut uppernarsarpaa:

- Kalaallini siullersaalluni ilisimatuunera meeraallunga tanngassimaarutigisarnikuuara. Inuk qungujulaartuaannarpoq, oqaluukkuminartuuvoq asannittuullunilu. Arlaanik quianartumik oqaluttuarnissaminut piareeqqasuaannarpoq qangalu pisarsimasut pillugit aamma oqaluttuassalluni nuannarisarlugu. Qanigisagut qimagukkaangata takorloortakkatsitut illuinnaqqissaarpoq, Robert Petersenip jorngua oqarpoq.