- Sinnattukka nunaqarfeerannguami suliffissaniik anginerugamik. Soorlu inatsisilerituutut sulerusuppunga kisianni aamma imaassinnaasoq advokatinngorniarusussinnaasunga taamaallilluni nunaqarfimmi ajornakusoortorujussuussalluni suliffissarisinnaasakka, Sikkerninnguaq Olsen oqarpoq. Assi: KNR

Ilisimatusarfimmi ilinniartoq: Angerlarseraluarlunga tunniutiinnarnianngilanga

Ilisimatusarfimmi ilinniartoq ilinniakkaminik unitsitsiinnarnissaminik qaammatini kingullerni marlunni eqqarsaatersorpoq. Ilinniartunulli siunnersortip oqaloqatigisarnera iluaqutsiullugu suli atuarpoq.

Sikkerninnguaq Olsen 22-nik ukioqartoq Ilisimatusarfimmi inatsisilerituutut 2018-imi ilinnialerpoq. Sikkerninnguaq nunaqarfimmit Upernaviup pigisaanit Nuussuarmeersuuvoq.

Nuummilu ilinniartuuneq oqittuinnaanngilaq.

- Angerlarsertarnermut. Angerlarserneq initusarnermut atuarnera paariunnaartarakku, Sikkerninnguaq Olsen oqarpoq.

Aatsaat taama ikitsigisut

Ilisimatusarfimmi ilinniakkaminnik taamaatitsisut ukiuni kingullerni tallimani ikileriarujussuarput. Tassami ilinnialernissamut piumasaqaatit qaffanneqarput, siunnersorteqartitsinissamik aaqqissuussaqarpoq, ilaatigut soraarummeernermi annilaanganermik pinngitsoortitsiniartunik ilitsersuisoqartarluni ilinniartullu sullinneqarnerat pitsanngorsarneqarluni.

Ilisimatusarfimmit kisitsisit naapertorlugit 45 procentit 2015-imi taamaatitsisimasut siorna 8 procentit taamaatitsisimapput.

AAMMA ATUARUK Ilisimatusarfimmi taamaatiinnartut ukiut sisamat ingerlanerini ikileriarujussuartut

Sikkerninnguamut decembari imaannaasimanngilaq. Angerlarsernini peqqutigalugu misilitsinnissamut piareersanngilaq. Tamanna ilinniartut siunnersortaata maluginiarpaa.

- Ingerlanerlioqattaarama apersorneqaqattaarpunga: "Sooruna? Taamaattanngilatit, sooq maanna taamaalivit?" Taava tassanngaanniit periarfissittalerpaannga "aajukua ikiortigisinnaasatit eksaminitit imatut ingerlassinnaavatit".

Sikkerninnguarlu tunniutiinnarnianngilaq. Ilinniagaq naammassippat najukkamut angerlarsinnaaneq ilinniartunut amerlasuunut oqilisaataasarpoq. Sikkerninnguamulli allaaneruvoq:

Sinnattut anginerusut

- Sinnattukka nunaqarfeerannguami suliffissaniik anginerugamik. Soorlu inatsisilerituutut sulerusuppunga kisianni aamma imaassinnaasoq advokatinngorniarusussinnaasunga taamaallilluni nunaqarfimmi ajornakusoortorujussuussalluni suliffissarisinnaasakka.

Neriunnerli pigivaa:

- Arlaannik ikiuussinnaaffinni imaluunniit susinnaaffinni periarfissanik ujaarlertuaannarpunga, nunaqarfinnimita susinnaavunga?

Nunaqqatiminut maligassiuerusuttoq

Naak ilinniakkani naammassiguniuk nunaqarfimmini atorsinnaanngikkaluarlugu Sikkerninnguaq Olsen nunaqqatiminut maligassiuisoorusulluni ilinniakkaminik unitsitsiinnarusunngilaq:

- Una oqaatigineqartartoq "allat sapinngippata aamma illit sapinngilatit misigivallaarnikuunngilarput. Kinami isigissagatsigu sapinngitsoq? Taava eqqarsartariaasera uaniilernikuuvoq takutittariaqarpakka sapinngitsut.

Nunaqqatinimi eqqarsaatigileraangamigit nukissaminik tunisittarluni oqaatigaa.

- Taanna eqqarsaat qamaniileraangami ingerlarusulerneq misigigaluaraangamaluunniit uniinnartariaqarpunga eqqarsaatigilertarpara uffa immaqa allat soorlu nunaqarfinni eqqarsaatigissagaanni immaqa isigivaannga ilinniartuunngortussatut taava taanna nukittorsaatigisarpaara.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat