Danskit iliuusissiaat: Ilisimatusarfik nutaaq Issittumilu nakkutiginninnerulerneq
Danmarkip nunanut allanut tunngasunut sillimaniarnermullu politikkikkut 2020-p tungaanut iliuusissatut pilersaarutaani, tusagassiortunik Københavnimi sisamanngormat katersortitsinermi saqqummiunneqartumi tamanna allassimavoq.
Iliuusissiami immikkoortuni pingaarnerni arfineq-pingasuni Issittoq ilaavoq. Tamanna sakkutooqarnikkut nunatsinni nakkutilliinerup annertusinissaanik ilaqarpoq. Illersornissamut ministeri, Claus Hjort Frederiksen (V) tusagassiortunik katersortitsinermi ima oqarpoq:
AAMMA ATUARUK Aleqap Samuelsen Issittumut pillugu arajutsisaqarnerarlugu isornartorsioraa
- Sikup aakkiartornera ilutigalugu Qalasersuakkullu sikuersimasukkut angallattoqarsinnaalerneratigut tamanna niuernermi soqutiginaateqaleriartoqarpoq. Niuernikkullu soqutiginnittoqarnerulerneratigut sillimaniarnikkut politikki aamma soqutiginarnerulissaaq. Taamaammat Issittumi minnerunngitsumillu Kalaallit Nunaanni eqqaanilu susoqarneranut paasisimasaqarnerussariaqarpugut.
Kalaallit Nunaat issittumi ilisimatusarnermi qitiussasoq
Danskit naalakkersuisuisa issittoq pillugu ilisimatusarneq aamma sammineqarnerutikkusuppaat. Taakku kalaallit oqartussaasuisa suleqatigineratigut nunatsinni ilisimatusarfimmik, tassa ilisimatuut katersuuttarfissaannik, pilersitsiniarput - tamannalu Kunngeqarfimmut Danmarkimut Issittumi ilisimatusarnermi sallersaatitsissaaq.
AAMMA ATUARUK Nunarput Issittumi ilisimatusarnermi katersuuffiussasoq
- Taaava aamma katersuuttarfik Kalaallit Nunaanni ilinniarnermut, aningaasaqarnermut suliffissaqartitsinermullu iluaqutaassasoq, danskit nunanut allanut sillimaniarnermullu polikkimi 2019-imit 2020-mut iliusissaani allassimavoq.
Nunarput tamakkerlugu sikusiornermut kiffartuussineq
Suliniutit pingajuat tassaavoq sikusiornermik kiffartuussinerup annertusinissaa, taamaalilluni sikusiornermik kiffartuussineq nunarput tamakkerlugu siunissami atorneqarsinnaalissalluni.
- Imaatigut angallaviusinnaalersut takornariaqarnerulernissaanullu periarfissat aqqutigalugit Kalaallit Nunaanni aningaasaqarnikkut ineriartorneq sikusiornermik kiffartuussinerup annertusinerata tapersissavaa, iliuusissiami allassimavoq.
Danmarkip illersornissamut nunanullu allanut tunngasuni politikkikkut susassaqarfinni USA-mik suleqateqarnini pitsanngorsassagaa, nunanut allanut tunngasunut ministerip Anders Samuelsenip (LA) illersornissamullu ministerip Claus Hjort Frederiksenip (V) tusagassiortunik katersortitsinermi erseqqissaatigaat.
AAMMA ATUARUK NATO-p Kangerlussuami mittarfik atorluartarpaa
AAMMA ATUARUK Amerikamut isumaqatigiissut annertoorujussuarmik iluaqutissiissooq
