Nunarput Issittumi ilisimatusarnermi katersuuffiussasoq
- Nunat angisuunik taasartakkavut soorlu USA, Rusland, Kina, Japan, Europamilu nunat arlariit issittumik ilisimatusarnertik ukiuni kingullerni annertusiartortiinnarnagu nunat pineqartut immikkut ingerlaasissaminnik aalajangersaanerulersimapput kiisalu suleqatigiiffigisinnaasaminnik naaperiaasarneq pingaarnerulersikkiartorlugu, naalakkersuisoqarfik tusagassiorfinnut taama nalunaaruteqarpoq.
Taamaammat Namminersorlutik Oqartussat Nunatsinni Ilisimatusarnikkut isaariaqalersinnaanissaa maanna misissorpaat.
Ilisimatusarnikkut isaariamik taaneqartoq ilisimatusarnikkut misissuiviussaaq nunanut tamalaanut atassuteqartoq, Nunatsinnilu suliffissanik pilersitsiviullunilu inuiaqatigiinni ineriartornermut ilaqutaasussaq.
Tamannalu qanoq pitsaanerpaamik anguneqarsinnaassanersoq Nuummi Hotel Hans Egedemi sapaatit-akunnerata tulliani ulluni marlunni isumasioqatigiinnermi oqallisigineqassaaq. Immikkullu ilisimasallit nunanit tamalaaneersut ilisimatusarnikkut isaariamik pilersitsinermut misilittakkatik ilaatigut saqqummiutissavaat.
